Read Komrem HLAHEI 29 Bible Online

HLAHEI 29 - Komrem bible

HLAHEI 29

¹Nangni marvâna aka-om chei in RŌNGPU kha manpâk ruh; alûrna leh ahratna kha choi ka-ân ruh.

²RŌNGPU rahming kalûr kha choi ka-ân ruh; A’ntheng Inkhatpa kha ahon’lâr pha leh ahmai kunga inkun ruh.

³Tuipui chung heia RŌNGPU rasa inthei; akalûrpen Pathen khan khō inri kapōa inri, khana akare rasa kha tui-ôngpui chunga jōng inthônga kae.

⁴RŌNGPU rasa kha ratha kaneitak a leh kalûrtak a inthei.

⁵RŌNGPU rasa khan cedar thingkunghei kha akatlir mathlek, Lebanon cedar thingkunghei kapha akatlir khōi heia kae.

⁶Ama’n Lebanon tlângbunghei kha sete kapōa amanthok hei, khana Hermon hmebung kha sechete kapōa amanchôm.

⁷RŌNGPU rasa khan khō amanphe.

⁸Arasa khan nêrdiram akatlir mannok; Kadesh nêrdiram akatlir mannok.

⁹Abek-inn shunga, mi rakip in, Pathen lûr rasoh! tia an-ôn et-lai, RŌNGPU rasa khan sasōkung akanok hei, khana thingbō hei akatlir mathlâk hei.

¹⁰RŌNGPU’n tui inthûk chunga vai arôn; ama’n reng inkhat kapōa are-rea vai arôn.

¹¹RŌNGPU’n amihei ratha ngarna apek hei, khana mōngna leh inṭhōia vângṭhat apek hei.