Read Komrem HLAHEI 31 Bible Online

HLAHEI 31 - Komrem bible

HLAHEI 31

¹RŌNGPU, nahrung sik enga nahneng kahei jōn che; mi amantor hêrmak hei roh. Nang chu Pathen kadik che kae; ahuk roh, kader che!

²Athei pek roh! Tûn ahuk roh! Ani kahuk, ka’n-ungna achang pek roh; kei kahukna sik a anikating achang pek roh.

³Nang ka’n-ungna leh anikakhâr che kae; naṭongtep dungjuia akei ina aṭhōi roh.

⁴Ka’n-ôkna sik a’nkam chânga inphut ahuksōt roh. Thina theia inphut inhngatna hmun apek roh.

⁵Nang ta-ensui sik a kabinga nahnenga inpek sōt eng, RŌNGPU, nang in nahuk sik eng; nang chu taksenthei Pathen che kae.

⁶Pathen kanimak inmuk hei kha nahōt hei, tâk ke’nchu nang kataksen che.

⁷Inthlengtik kaneimak nalungsetna jâra, kahōi sik eng khana inpâk sik eng. Nang in ka’nrengna nahmu pek eng; kakhōdengthei namanhret pek eng.

⁸Ka’nrepuihei rehringa amansur mak hei che; kase hnōmna hmun a ning leh hnōma setheina napek eng.

⁹RŌNGPU, kei alungset roh, ajârchu khōdeng kathei jo, kaṭap reina kahmit kakham jo, kei kaṭōiber jo eng.

¹⁰Malung inrim in amanchâm neng jo eng, khana ṭapna hin kahringkhō amantôi jo. Inrengna rakip a inphut kei katlâksam jo eng. Karu kachâng kapha’m hong kaṭōi jo hei.

¹¹Ka’nrepui rakip he’n, adek a kakhō kaven he’n. Hnōisena aninei jo eng; ani’nhret he’n anṭit jo eng; hlampuia anhmu eng pha, antlânde jo eng.

¹²Mi rakip in akathisa kapōa anmahngi jo eng; hlonsōt neinâk heikhat kapō kha kachang jo eng.

¹³Ka’nrepui katamtak he’n marûk a antahri sepsop kathei; kasir kapanga ṭitna khan akatōmbit eng! Anmani’n kei kadōia ṭōn anmantluk, kei thatna sik a intluk hei.

¹⁴Tâk-kha kataksenna nachunga ka-om, O RŌNGPU; nang ka-Pathen che kae.

¹⁵Kei chu ahei tik a nang ensuina thōia ka-om eng; ka’nrepui heia inphut ahuk roh, khana suk manrim anikapek heia inphut ahuk roh.

¹⁶Nasōkpa chunga lungset a ajōng enṭhak roh; inthlengtik kaneimak nalungsetna khan ahuk roh.

¹⁷RŌNGPU, nang kabek che. Inzakna apek mak roh. Mikaṭhamak-hei kha inzak chen hei rasoh; khana anmani kha kadai hngera kathirama sehei rasoh.

¹⁸Malei kaseihei kha sip manti hei roh, khana mikadik-hei chunga hnōisetak a ṭong kahri mi inlensak leh êngkasehei kha.

¹⁹Nang kajana kaneihei sik a nadapek neinâk-hei kha heituk-hrep a a’nlak jo hei mo! Mi rakip in heituk-hrep a akaṭha che mo, nang kataksenhei kha heituk kakhôk a nahrung hei mo ti hi anmanhret.

²⁰Milak-hei hlōna ṭōnmantluk a inphut na-âng shunga anmani kahringa nathup hei; an-inrepuihei manzakna inphut inhukna hmun inkhat a anmani nathup hei.

²¹RŌNGPU kha choi ka-ân ruh! Kei ankakekhum enga anbuhlu eng lai khan, heituk a inlaktak a alungsetna eng kha amalâr jo mo!

²²Ama’n a-âng shunga inphut ahlon sōt jo eng mo tia ke’n kalei mandona leikaṭi eng. Tâk-kha inthōpuina sik ke’n kabek pha, ama’n kapengna rasa athei pek eng.

²³Ahnenga taksenthei akachang rakip in RŌNGPU kha lungset ruh! RŌNGPU’n taksenthei hei kha ahrung hei, tâk a’nlensak hei kha anrahōi kasōk karâkna apek hei.

²⁴RŌNGPU hneng inhōrna kanei rakip nanratha manngar ruh, inngamna nei ruh.