Read Komrem HLAHEI 37 Bible Online

HLAHEI 37 - Komrem bible

HLAHEI 37

¹Mikaṭhamak-hei jâra malung châmna neimak roh; akadik mak katlohei chunga nathang manset mak roh;

²Kahar ahong kachâr kapōa anmani inranga inhmang sik jo hei; thingbō invōi kapōa anmani kathi sik jo hei.

³RŌNGPU kha taksen roh khana akaṭha tlo roh; ram shunga khan om ina hringna chen roh

⁴RŌNGPU hnenga nahōina sik kha jong roh, khana namadu kha apek sik che.

⁵Nabinga RŌNGPU hneng inpek inhlut roh; ama taksen roh, khana ama’n nang a’nthōpui sik che;

⁶ama’n nadikna kha sûnṭim kanivâr kapōa amanvâr pek sik che.

⁷Dehrat roh khana RŌNGPU ṭōn tlo sik kha hngâk roh; mikahaohei chunga khan malung manchâm mak roh, a-emak leh anmani ṭhatmak ṭōn mantlukna hei hme ansō jâra malung hōimakna neimak roh.

⁸Malung hōimakna a-emak leh hnuk natna khan inpek sōt mak roh; khava khan bōina rōk a aṭhōi sik che.

⁹RŌNGPU kataksenhei khan ram kha anchen sik; tâk mikaṭhamak-hei chu hnongsōt a ka-om sik hei.

¹⁰Mikaṭhamak-hei kha inranga inhmu mak hei ning. Nang in najong he’num hmumak hei che ning.

¹¹Tâk-kha a’nsinsak he’n ram kha anhlō sik, khana neina leh lung mōngna anhmu sik.

¹²Mikaṭhamak he’n mikaṭhahei dōina ṭōnse anmantluk, khana enkada leh inṭhōia êngset a antlo hei.

¹³Tâk-kha RŌNGPU’n mikaṭhamak-hei kha amanuisō hei; ajârchu anmani inranga suk manhmanga anka-om sik kha amanhret.

¹⁴Mikaṭhamak he’n sarahei leh khōdeng katheihei, khana akadik katlohei thatna sik a anchemjâm anradok a ansai ankeia kae.

¹⁵Tâk-kha anbinga anchemjâm vâng in athat sik hei, khana anthe ansai hei ansuk mathlek sik hei.

¹⁶Mikaṭhamak rakip hei nei leh hao kanek a mikaṭha inkhat in ajingte anei kha kaṭha jôk.

¹⁷Ajârchu RŌNGPU’n mikaṭhamak-hei ratha hratna kha alosōt sik, tâk mikaṭhahei khachu ahrung sik hei.

¹⁸RŌNGPU’n aṭong kajuihei a-ensui ṭhak hei, khana ram kha ahei tik a antâ kachang sik jo.

¹⁹Pha ṭhatmakna ahong inum khōdeng theimak hei ning; Ṭâmpui a-om inum sâk sik vâtmak hei ning.

²⁰Tâk-kha mikaṭhamak-hei khachu kathi sik hei. RŌNGPU inrepuihei khachu ram a reipâr aṭōi kapōa inhmang sik jo hei khana hmeikhu kapōa inhmu mak jo hei ning.

²¹Mikaṭhamak in mi hnenga avapûk tâk pek male phungmak, tâk mikaṭhahei chu ankutchoi leh anmalung kalen.

²²RŌNGPU’n vâng apek hei khan ram kha anchen sik, tâk ama’n ahâksêr hei khachu hnongsōt a ka-om sik hei.

²³RŌNGPU’n mihei kha ansena sik hlam a aṭhōi hei. khana amalung tlaina katlohei kha ahrung hei.

²⁴Anmani antlûk jo innum khanga omthang mak hei ning; ajârchu RŌNGPU’n a’nthōpui sik hei.

²⁵Tûnchu kater jo eng, kum kasôttak hongkahring jo eng, tâk RŌNGPU’n mikaṭhahei kha adahlon hei a-emak leh asa he’n mi hnenga sâk kader a kalôn lele hei ti hi lahmu hêrmak eng.

²⁶Pha rakip a anmani’n pekna a ankut kayâng, milak-hei sêr anmanpûk hei, khana asahei kha anvâng chen hei kha kae.

²⁷Akaṭhamak a inphut nahmai mahe ina khana ṭōn kaṭha tlo roh; khana nansa nante he’n ram a khan ahei tik a ka-om sik hei.

²⁸Ajârchu RŌNGPU’n akadik amadu, khana taksenthei kachang amihei kha dahlon mak hei. Ama’n ahrung ṭhak hei, tâk mikaṭhamak sōn leh pârhei khachu hnongsōt kachang sik hei.

²⁹Mikadik-hei khan ram kha anhlō sik, khana anmani ahei tik a ram shunga khan ka-om sik hei.

³⁰Mikaṭha ṭonghrisōt hei khachu singna kae; khana khahei kha ahei tik a ṭong kaṭhahei kae.

³¹An-Pathen dân kha anmalung shunga anvon ṭhak khana khavakha leh ahei tik a inthla mak hei.

³²Mikaṭhamak he’n mikaṭhahei kha that sik a anreia an-en madip hei;

³³achang ravâng RŌNGPU’n mikaṭhahei kha ankadōihei tator sik a dahlon mak hei ning a-emak leh anṭongtan pha leh maset manchenna sik tlomak ning.

³⁴RŌNGPU hneng inhōrna nei ruh khana aṭongpek-hei kha jui ruh; nahnenga ram kha apek sik chea kha manlûrna anei sik che, khana mikaṭhamak-hei hnongsōt a anka-om kha nahmu sik.

³⁵Ke’n phâkhat a mikaṭhamak, êngkase inkhat kalei manhret; ama Lebanon ram a cedar thingkung kapōa mi rakip aleimakhu hei.

³⁶Tâk-kha hnung leh chu khava hmun a khan kavase pha, ama leiom mak jo, kajong lele ravâng hmumak jo eng.

³⁷Mikaṭhahei kha manhret hei ruh; mikadik-hei kha chîk hei ruh; nun-innem he’n sōn leh pâr annei hei,

³⁸tâk mikaset-hei khachu pui katluk a mi’n anmanhmang hei, khana ansōn anpârhei kha’m karamsō hei.

³⁹RŌNGPU’n mikadik-hei kha asan hei; khana inrengna pha ahuk hei.

⁴⁰A’nthōpui hei khana ahuksōt hei; mikaṭhamak heia inphut ahuk hei, ajârchu huksōtna madu jâra ahnenga kahlut heia kae.