Read Komrem HLAHEI 38 Bible Online

HLAHEI 38 - Komrem bible

HLAHEI 38

¹O RŌNGPU, hnuk kana tak a karâkna apek mak roh!

²Nathe kâp eng vâng sungbi namanrôn jo eng; khana navōk mathlûk jo eng.

³Nahnuknat jâra inhnaktak a kana jo eng; kaset jâra kataksa pumpui nat leh sat in akatōm jo eng.

⁴Kasetna tuikalen khan akachûm jo eng; khahei kha rôn sik a akahrik hêr phur inkhat kae.

⁵Ajârchu kei leikamo jo eng, kanatna bihei kaṭop inthla a khana kathu jo hei.

⁶Kei ankei mankun enga ankahnur cher jo eng; sûn nilun ṭajai kasui jo.

⁷Kataksa hi hritlun in aro mankâng eng, khana thi rong kati jo.

⁸Kei katlasam cher jo eng khana ankahnur cher jo eng; kamalung inrima kanat ka’nkōipui jo.

⁹O RŌNGPU, kamadu kha heimo nang in namanhret; nang in ka’nkōi rasa heirakip nathei pek enga kae.

¹⁰Kamalung insu tutuk a karatha katlang jo, khana kahmit hei hmutorna hong katlangsō jo.

¹¹Kaṭim kare hei leh kakhō kaven he’n natbi karôn jâra ava phâkmak hei ning; ka-innshung mihei kapha’m keia inphut inhla jo hei.

¹²Kei kathat hnōm hei khan ka’n-ôkna sik châng ankam, kei kasuset hnōm hei khan manhmang sik a anmaṭhit eng; kei dōina sik mantlukna bângtik neimak hei.

¹³Kei chu kōr kaset kapōa khō theimak jo eng; ṭongtheilo kapōa ṭonghri theimak jo eng.

¹⁴Ṭong insôn theimak ka-ang jo eng; ajârchu anmani’n kakare theimak jo hei.

¹⁵Tâk-kha O RŌNGPU nang kataksen che; khana O RŌNGPU, ka-Pathen, nang in kaderna namasôn sik eng.

¹⁶Kamalung inrengna chunga ka’nrepui he’n manuisōna aneimak hei rasoh; kei tlûkna chunga in-orna neimak hei rasoh!

¹⁷Kei katlu vetvet jo eng khana natna kadeṭhak joa kae.

¹⁸Kasetna hei insir enga kaphôngsōt, khahei khan madu rangeina anmansip eng.

¹⁹Ka’nrepuihei kha antak kaṭha khana kahrat hei; ajâr kasejena kaka-en kada katam hei.

²⁰Ṭōn kaṭha kha ṭōnse vâng malena sik katlohei kha kei kadōihei kae, ajârchu kei chu akadik tlona sik a inṭang eng.

²¹O RŌNGPU adahlon mak roh, ka-Pathen asesōt pek mak roh!

²²O RŌNGPU, kakahuk inhringpa, tûnhin a’nthōpui jo roh!