Read Komrem HLAHEI 45 Bible Online

HLAHEI 45 - Komrem bible

HLAHEI 45

¹Rengpa sik a hla kanphōna hin ṭong kahōi khan kamalung hongkasip. Lekha inzet kathempa kolôm kapōa, kamalei hi jai-ôi katei sik a intlukdek jo.

²Nang pasehei kâra hme kaṭhapen che kae; ṭonghri kathem pen che kae; Pathen in ahei tik a mahâmṭhat apek jo che!

³Nakhōna chemjâm invon kaṭha roh, rengkalen; nang chu akalûrpen leh kaja ka-ompen che kha kae.

⁴Ṭong kadik leh ṭong intlun hrungna sik a Kalûrtak a retorna kha chōng jo roh! narathahrat khan retorna kalentak amannei sik che!

⁵Nathehei kha kangeijap hei, khahei khan na’ndōipui hei malung ankâpthlen, jât-hei nakekunga katlu hei.

⁶Pathen tapek che rengram kha kumleikōa ka-om ṭhak sik. Nang in namihei chunga ṭong kadik vâng vai narôna kae.

⁷Nang in akadik kha namadu, akaṭhamak kha namater a kae. Khava jâra Pathen, na-Pathen in nang kha akadei che khana reng ralak-hei kanek a nachunga hōina ajōng bun mathlâk pek chea kae.

⁸myrrh leh aloe thai marim katui napōn heia inhnam; saiha vâng ret antasyem reng-innpui shunga hlakasak he’n ratōna annei che.

⁹Na-innpui shunga khan nuhmeihei kâra, reng sanuhei invei hei, nareng in-ongna changting khan rengnu kangira ka-om, sana inthengpen vâng inret a kae.

¹⁰Reng sik a hmōinu, kahri hi rangei roh, na-innkōhei leh namihei mahngi jo hei roh.

¹¹Nahmeṭhat kha rengpa’n maduna anei sik che; ama kha nakapu kae, aṭong narangei nger sik kae.

¹²Tyre mihe’n kutchoi heipek sik chea anheirôn sik; mikanei he’n ôtum chentheina sik a anjōngtlo sik.

¹³Reng-innpuia reng sanu ka-om, heituk a ahme akaṭha jo mo! Aretpōn hei kha sana hrui vâng rōk a insyem.

¹⁴Pōnje kanei vâng inret a reng hnengting anṭhōi, aṭhōn nuhngâk he’n akahnung anjui, khana anmani kha’m ahnenga anṭhōi manhlut hei.

¹⁵Inpâk leh katlâi senga anmani kahong hei, khana rengpa innpuia kahlut hei.

¹⁶Karengpa, nang, napusōn hei hmun kahlō sik a reng kachang sik sapa hingja nanei sik hei, khana anmani kha vânhnōi pumpuia vai namanrôn sik hei.

¹⁷Kahlasak hin narahming kha ahei tik chen a amanthang ṭhak sik. akahong sik pha rakip a mi rakip in nang anmanpâk sik che.