Read Komrem HLAHEI 48 Bible Online

HLAHEI 48 - Komrem bible

HLAHEI 48

¹Ni-Pathen khōpui kalen, atlâng intheng chunga khan, RŌNGPU kha kalen khana inshângtak a choi manshâng sik kae.

²Pathen tlâng Zion kha inshânga kaṭha hêr; reng kalenpa khōpui khan vânhnōi pumpuia inpâkna ahei rôn.

³Khōpui rekur shunga khan ama leh omsapna hmun a hringna ka-om ti kha Pathen in amalâr.

⁴Zion tlâng kabuhlu sik a, renghei intûp hei.

⁵Tâk-kha anmani’n kha anhmu pha andet-hla jo; anmani kaṭi heia katlân jo hei.

⁶Khava hmun khan, anmani nupui nai kanei sik inkhat kapōa, ṭit leh malung inrimna kasip jo hei.

⁷Thlihrâng inhnak tasuk ratō rakōng ka-ang jo hei.

⁸Chunghnung Pathen ni-RŌNGPU khōpui kalena khan, Pathen ṭōntlohei kha nithei jo, khana tûnchu khahei kha nihmit in nihmu jo; khōpui kalen kha ama’n ahei tik a ahukṭhak sik.

⁹Eh Pathen, nabek-inn shunga khan nalungset inthlengmak kha kanmandon.

¹⁰Mipui in hmun rakip a anchoi ka-ân che, khana narahming kalûr raleichung pumpuia inthangsō. Nang in akadik vânga vai narôn;

¹¹Zion mihei kha inpâk hei rasoh! Nang in akadik a ṭong tanna nanei; Judah khōpui shunga hōina nei hei rasoh!

¹²Pathen mipuihei, Zion kimvea lôn una inn inshâng hei kha tei hei ruh;

¹³abâna sōn leh pârhei hneng nanhri pek theina sik hei, abanghei kha merchîk hei ruh, khana arekur hei kha enmanchên hei ruh:

¹⁴“Hiva Pathen hi kumleikōa ni-Pathen kha kae; akahong sik pha rakip a ama’n achingṭhak sik me.