Read Komrem HLAHEI 49 Bible Online

HLAHEI 49 - Komrem bible

HLAHEI 49

¹Mi rakip in thei ruh! Hmun rakip a ka-om mihe’n rangei ruh,

²kalen leh kasin nanchanga, kanei leh sara nankhenga.

³Kamandonna hei intheng seng sik; singna ṭonghei kahrisōt sik.

⁴Ṭongchîk heia kamalung kamanhlut sik serângdâr âtpum a ṭong inri hei kahri manchên sik.

⁵Bōina pha heia khan, anikadōi he’n kakimvea ankake eng pha,

⁶annei leh hao chunga inngamna kanei mikaṭhamak-hei leh anhaona chunga inlensakna kanei he’n, ankake eng pha ṭitmak hei eng.

⁷Mi inkhat in abinga intlensōt tor mak; ama’n ahringkhō man Pathen hneng pek tor mak,

⁸ajârchu mi inkhat hringkhō man hi katam hêr . Apektor chen apek inum tlukmak ning;

⁹thlânkhur shunga ahlut makna sik, kumleikōa ahring theina sik aman kha katam hêr .

¹⁰Akamo leh a’nvet hei thi kapōhrep a mikasinghei thi kha, mi rakip in anhmu. Annei leh hao rakip ansōn leh anpârhei hneng anleidahlon hei.

¹¹Anmani’n pha khat a ram anleinei ravâng, anthlân kha kumleikōa an-inn kae; khana khan pha rakip a ka-om jo hei.

¹²Mi inkhat lenna khan thina inphut huk tor mak ning; ranhringhei kapōa akathi nger sik kae.

¹³Anbinga inngamna kaneihei chunga heimo kasōk jo enruh; annei chunga tlaina kanei he’n hei vângmo antachen kha enroh,

¹⁴that sik a ka-om kemōng kapōa anmani anmalung inrim, khana Thina kha ankakhempa kachang sik. An-inna inphut hmun kahlatak thina ram khan antaksa kha inranga aṭop leh inṭhōia, jîng khōvâra akadik khan anchunga torna ahongnei sik jo.

¹⁵Tâk-kha Pathen in kei chu ahuk sik eng; thina ratha hratna inphut akeisōt sik enga kae.

¹⁶Mi inkhat mikahao ahongchang jo pha, akarōi kha ahong pung hêr jo pha, malung tlâkna neimak roh;

¹⁷athi pha leh khavakha inchoi theimak ning; khana akarōi hei kha ama leh thlân shunga hlutsap mak hei ning.

¹⁸Mi inkhat kha ahringkhō shunga amalung atluk joa, achung sōkna jâra mihe’n anchoi manshâng jo’num,

¹⁹ahei tik a inthimṭhak a aka-om thina ram khan apusōnhei kha ava’nchunpui nger sik hei kae.

²⁰Ama lenna khan thina inphut huk tor dekmak ning; ranhringhei kapōa akathi nger sik kae.