Read Komrem HLAHEI 50 Bible Online

HLAHEI 50 - Komrem bible

HLAHEI 50

¹Akahratpen Pathen, RŌNGPU kha kaṭonga, nisōa inphut tlaitlâk katlung, raleichung pumpui abek.

²Akaṭha pui katluk khōpui kalen Ziona inphut Pathen in avâr ajōngser.

³Ni-Pathen kha kajōng jo, tâk sip katia jōngmak ning; hmeimale kha ahmating injôk, thlihrâng inhnak khan akatōm.

⁴Amipuihei ṭong atan sik kha avaka-en sik a, marvân leh ralei hei kha sâkhi sik a abek hei.

⁵Ama’n, “Kahnenga inthoina tōkna kaneia ṭongkamna kaneihei, taksenthei kachang kamihei kahnenga hong intûp ruh”, ati.

⁶Marvânhei khan Pathen kha akadik kae, ama khet kha ṭong katan sik kae, tia anphông!

⁷“Kamihei rangei ruh, ke’n ṭong kahri sik; Israelhei nangni kadōia ṭong kahri sik kae. Kei Pathen eng, nan-Pathen eng kae.

⁸Ro mankhutna kahnenga nanhei choiṭhak jâra leh maichâm tōkna nantloṭhak jâra masetmak chei eng.

⁹Kha achang inum nanserōnga sehratche a-emak leh nanke rup-hei kâra ache hei kha rangei mak eng;

¹⁰ajârchu ratu shunga sha rakip leh hmebung lishing lishinga se heiso keita hei kae.

¹¹Ram thōia va rakip leh ram shunga ranhring rakip keita hei kae.

¹²“Kavon aṭâm inum nanhnenga sâk thei dermak chei ning; ajârchu raleichung leh ashunga ka-om rakip kata hei kae.

¹³Sehratchehei hme kasâk a mo? a-emak leh kehei thisen ka-ina mo?

¹⁴Manpâkna nantanei kha Pathen hneng nan-inthoina chang rasoh, khana nan-intepna rakip Chunghnung hneng pekna nei ruh.

¹⁵Nan-inreng pha leh kei eibe ruh; kahuk sik chei, khana nantamanpâk sik eng kae.”

¹⁶Tâk-kha mikaṭhamak-hei hneng khan Pathen in ahri, “Heisik a mo kaṭong pek hei kha nantateisōt sik? Heisik a mo ka’ntepna kha nantahrisōt sik?

¹⁷Kei tamandik sik che kha’m hnōm mak che; kaṭong pek hei kha’m nahlon sōt hei.

¹⁸Inru nahmu rakip hei leh ṭhōn kachang che, khana akajông hei kha na’nthlop pui hei.

¹⁹“Akaṭhamak hrina sik a intluk ṭhak che; maleisei kahri sik a inzak mak che.

²⁰Nang pare-patung hei maher sik a, khana ansuk ṭhenahei kajonga intluk che.

²¹Nang in hihei rakip hi natlo hei, ke’n heite’m hrimak eng, khava jâra kei hi nang kapōa namandon jo eng. Tâk-kha tûnchu kamaset che khana nahnenga kahri mantherpek che kae.

²²“Kei ani kateitôm hei, hivahi rangei ruh; achangmak inchu ke’n kasuk manhmang sik chei; khana nankahuk sik tûte om mak ning.

²³Kei ani inja he’n manpâkna antapek eng kha, inthoina kha kae; khana kaṭong kajui rakip kha kahuk nger sik hei.”