Read Komrem HLAHEI 55 Bible Online

HLAHEI 55 - Komrem bible

HLAHEI 55

¹Eh! Pathen kaderna arangei pek roh, kangekna che hi hnung asungpek mak roh!

²Arangei pek ina amasôn roh, malung inrima kaṭōiber jo eng.

³Ka’nrepuihei maṭhitna hei eng khan ṭitna kanei jo, mikaṭhamak-hei êngsetna khan ankahnur jo eng. Kachunga inrengna anmasō; kachunga anhnuk kana, khana anhōt eng.

⁴Kei ṭit-inpirna kanei, thina inrimna khan akahnur eng.

⁵Ṭit leh innokna’n amanrim eng. malung natna khan ahlō eng.

⁶Vaṭhu kapōa mathla kanei inchu tia kamandon. Châmhngatna hmun kajonga leikajōng sik eng!

⁷Kahlatak a kajōng sik enga kha, nêrdiram a ka-inn kavasyem sik.

⁸Thlipui khōpui phâk makna sik a inrangtak a ka-omna sik hmun kha kajongsōt sik.

⁹O RŌNGPU, kakadōi hei ṭonghri kha manhmak pek hei roh. Khōpui kalen shunga innâk-inse akasōk kha kahmu,

¹⁰sûn leh jân khōpui akimvea, intuk inthat leh bōina kha kasip a kae.

¹¹Hmun rakip a insuksetna ka-oma, hlampui heia suk manrimna leh hmumasina khan kasip a ka-om.

¹²Kei inrepui inkhat in adei eng achang inchu kade thei sik; anikadōi inkhat in a’nlensak achang inchu ka’nthupde thei sik.

¹³Tâk-kha nang chu kei inthloppui, kasōpui changpui, khana kaṭhōn che kae.

¹⁴Eini chu khat leh khat ṭong kahōi inhrina me; khana Bek-inna’m kamukna nineisap a kae.

¹⁵Ka’nrepuihei kha anpha atluk mak lai thi hei rasoh; anhring pum a kathirama sehei rasoh! An-innshung leh anmalung shunga ṭhatmak ka-oma kae.

¹⁶Tâk-kha kei inthōpui sik a RŌNGPU Pathen kha kabek, khana ama’n ahuk sik eng.

¹⁷Jîngkâr, sûnṭim, khana jân a ka’nphinna leh ka’nkōina kha ahnenga katlung, khana karasa athei pek sik eng.

¹⁸Kei inrepui khangja hei kadōia kahre tukna hmun a inphut ama’n kahringa aheiṭhōi male sik eng.

¹⁹Are-rea vaikarôn Pathen in, kaderna arangei pek sik eng, khana ator sik hei; ajârchu anmalung thlenghnōm mak hei, khana ama kha ṭitmak hei.

²⁰Hma kalei inthloppui inkhat khan aṭhōnhei kha abuhlu hei; aṭong intepna hei kha asuk khōia kae.

²¹Aṭong hri hei kha sene thai kanek a inne, tâk alungri chu mi enkadana rōk kha kae; aṭonghei kha thai kapōa inne, tâk chem kangei hei kapōa atuktana kae.

²²Na’nrengna hei kha RŌNGPU hneng dahlon jo roh, khana ama’n ahrung sik che; malung intheng hei kha hei lai enum mihei tator sik a phemak ning.

²³Tâk-kha, Eh Pathen, nang in mikathat-hei leh malei kaseihei kha anhringkhō aṭim khatbek um atlang mak lai anthlânkhur shunga naṭhōi manhlut sik jo hei. Ke’nchu, nang kataksen ṭhak sik che.