Read Komrem HLAHEI 56 Bible Online

HLAHEI 56 - Komrem bible

HLAHEI 56

¹Eh Pathen, kei eilungset roh, ajârchu kei anbuhlu jo eng; ka’nrepuihei khan pha rakip a ansuk manrim eng.

²Kakadōi hei khan sûn nilun anbuhlu eng, kachunga re katlohei hi katam hêr hei.

³Eh Chunghnung Rōngpu, ṭitna kanei pha leh nahnenga kataksenna kha kada a kae.

⁴Pathen kha kataksen khana ṭitna neimak eng; aṭong tepna jâra khan ama kachoi ka-ân. Ralei mihring he’n kei heimo antamanlo tor sik eng?

⁵Ka’nrepuihei khan sûn nilun bōina anpek eng; kei insuksetna sik ahei tik a anmantluk ṭhak!

⁶Inthupna hmun heia, katlona rakip a an-en mathlip ṭhak eng, kei kathat sik a inhōr hei.

⁷Anṭhatmakna jâra khan karâkna pek hei roh, Eh Pathen, nahnuknat khan anmani so tor hei roh!

⁸Hinghrep ka’nrengna hi namanhret; kahmit rathli sōkna hei kha namazet pek eng. Khahei kha nalekha rabu shunga in-gôra damak hei che mo?

⁹Nang kabek ning che, kei inrepuihei kha ankahnung inle sik jo hei. Hivahi kamanhret: Pathen hi kei langa ka-om,

¹⁰aṭong tepna jâra kamanpâk RŌNGPU kha kae.

¹¹Ama kha kataksen, khana ṭitna neimak ning. Mihring mâr he’n kei heimo antamanlo tor sik eng?

¹²Eh Pathen, ka’ntepna hei kha nang kapek sik che; manpâkna tōkna kha maichâma kapek sik che,

¹³ajârchu thina inphut a nahuk eng, khana mihei torna inphut a nasansōt eng. Khava jâra akahring hei chunga akavâr vâr shunga, Pathen omna hmun a khan kei kalôn eng.