Read Komrem HLAHEI 65 Bible Online

HLAHEI 65 - Komrem bible

HLAHEI 65

¹Eh Pathen, Ziona kantamanpâk sik che leh kan-intepna hui kanta mathlung sik hi akadik kae;

²ajârchu kanderna hei kha namasôn ung. Hmuntina mihei kha nahnenga kahong sik hei

³ansetnahei jâra. Kanṭhena khan ator jo ung, tâk nang in narangei mandam hei.

⁴Nang in nakadeisōt hei kha, nahmun inthenga aka-om sik a najōngṭhōi hei kha, mikahōihei kae. Na-inn shunga neinâk intheng hei leh nabek-inn intheng shunga vângpekna hei vâng khan, keini katlâi sik ung.

⁵Kanderna masônna khachu, retorna kha napek ung; khana keini hukna sik ṭōn-inlak natlosōt hei. Raleichung pumpui leh tui-ôngpui rekhat a mihe’n antaksen che.

⁶Hmebunghei kha ahmun et a nada hei, khang’khan naratha hratna kha namalâr.

⁷Nang in tui-ôngpui inhrung leh tui in-nông hei rasa hei kha namandai hei; mihei inhângna ṭong inhrek kha namandai.

⁸Nang in ṭōn kalenhei natlo jâra vânhnōia mihe’n ṭittak a sip katia kangir hei. Naṭōn tlohei khan kekung kelera inpâk a ôngna kha amansōk.

⁹Nang in khō najōng mansûra, ralei hi kaṭha na-ensuina kha namalâr; ralei hi namanhao khana athai namansip. Kava dunghei tui namansip hei; khana raleia hmuchi namankek hei. Natlodân kha hi kae:

¹⁰Hlei khōina chunga khōtui katluk a naman sûra tui shunga inche hei; ralei kha khō rahmea khan namanchor mannem hei sachi kadông hei namankek heia kae.

¹¹Naṭhatna khan heituk a akaṭha sâng khômna kha aman om jo mo! Nasena rakip a khan katluk a ka-oma kae.

¹²Ratua hardông heia serup-hei kasip hei; hmebung apang hei kha inpâkna kasip hei.

¹³Hleipuk-hei kha kemōng kasip hei, Phaichamhei kha gehu kasip phet. Heirakip in inpâk a ka-ông heia hla ansak a kae.