Read Komrem HLAHEI 68 Bible Online

HLAHEI 68 - Komrem bible

HLAHEI 68

¹Pathen kathōisōt a a’nrepuihei kha asuk kathek hei. Akahōt hei kha ator heia katlânsōt hei.

²Hmeikhu niphusōt kapōa, anmani kha ahnong sōt hei; hmei hnenga khōihnât kajor kapōa, mikaṭhamak-hei kha Pathen hmaikunga inhmang sik hei.

³Tâk-kha akadik-hei khachu ahmai kunga anning kaṭha a, inpâk hei; kahōi heia inpâk a ka-ông hei.

⁴Pathen hneng hla sak ruh, arahming choi manshângna hla sak ruh; sumtuk chunga kachōngpa hlam kha syem mantlun ruh. Arahming kha RŌNGPU kae, a-âng kunga inpâk ruh!

⁵Abek-inn intheng shunga aka-om Pathen khan nu leh pa kase leh renghmeihei kha a-ensui hei.

⁶Ama’n binga akalôn hei kha omna sik inn apek hei khana kurkhum shunga aka-om hei kha kahōia amasō hei, tâk akadōihei khachu mi tadahlon ram a ka-om sik hei.

⁷Eh Pathen, namihei nachinglai hei, nêrdiramthōi nahong rakan puilai hei khan chu

⁸ralei hi le’nnok a kae; khana bōirōk in sûrtui ajōng bun mathlâk a kae, Sinai Pathen kha ajōng jâra, Israel Pathen kha ajōng jâra.

⁹Katluk set a khō naman sûra, ram kachâr kaṭōiber jo kha nasyem manṭhat nôk;

¹⁰namihei khan khana khan an-inn ansyem; naṭhatna khan sarahei inveina sik napek hei

¹¹RŌNGPU’n ṭongpek kha aleipek khana nupui katamtak in aṭong kha anrôn sōt:

¹²“Renghei leh anremihei kha katlânsōt jo hei!” anti. Inna ka-om nupuihei khan chomsōt neinâk-hei kha insem jo hei.

¹³khahei khachu dangka vânga insyem pherva lim, anmathlâ kha sana intheng vâng insyem kadi rik-rak hei. (Heisa mo nangni ṭhahrep kemōng rōnga, kemōnghei kâra, re tlolai aka-om chei?)

¹⁴Akahratpen Pathen khan renghei kha Zalmon Tlânga akathek manchek hei pha, khana khan kavur aleimathlâk pek hei.

¹⁵Heituk a akalen jo Bashan tlâng, bilik katamtak omna tlâng kae!

¹⁶Heisa mo nang in Pathen omna sik akadeisōt tlâng kha natlângler heia inphut mater tak a najōng en? RŌNGPU kha kumleikōa khava hmun khan aka-om sik kae!

¹⁷Ashakor gâri lishing katamtak leh RŌNGPU’n Sinaia inphut hmun inthenga khan jōng kaṭum.

¹⁸Hmebung inshânga khan ama leikake rehringa surmi katamtak aṭhōisa hei; ama’n akadōi heia inphut kutchoihei arahlâng. RŌNGPU Pathen kha khan ka-om sik.

¹⁹Niphur kahrik ani katai anikarôn pek RŌNGPU kha choi ka-ân ruh; ama hi ani kahuksōt Pathen kha kae.

²⁰Eini Pathen hi akahuksōt Pathen kha kae; ama hi RŌNGPU, ni-RŌNGPU, thia inphut ani kahuksōt kae.

²¹Pathen in a’nrepuihei, setna hlam a akase ṭhak hei, anlu kha avōkkhōi nger sik hei.

²²RŌNGPU’n ati, “Ke’n Bashana inphut nan-inrepuihei kaheiṭhōi male sik hei; tui-ôngpui inthûk a inphut kahong ṭhōimale sik hei,

²³nangni’n anthi kha tuipea nanpê theina sik, khana nan-ui he’n anmadu chen a anmalekna sik.”

²⁴Eh Pathen, naretorna hlam a na’njôk kha hmun intheng kajōna, kareng, Pathen injôk kha mi rakip in anhmu che.

²⁵Hlakasak he’n hmating, mahring inhring he’n hnungting, ankâra khan nuhngâk naipang he’n khōngte ankabena hla ansak a kae.

²⁶“Amipuihei intûpna khan Pathen kha choi ka-ân ruh; Jacob sōn nankhenga RŌNGPU kha choi ka-ân ruh!” anti.

²⁷Ahma inkeipena Benjamin, phung kasinpen kahong; abâna Judah hlamkakeihei leh arup hei, abâna, Jebulun leh Naphtali hlamkakeihei khan anheijui hei.

²⁸Eh Pathen, keini hei kahlanga naleihmang narathahrat kha malâr roh

²⁹reng he’n kutchoi anhong pekna che nabek-inn Jerusalema inphut.

³⁰Phairōng kâra ramsha kapō Egypt so rasei roh; sehratche leh sete hei rup kapō jât-heiso rasei hei roh, ankhenga anhong inkuna andangka anhongtōk mak lai seng che. Re katlo hnōm mipuihei kha hnong kachek hei roh!

³¹Egypt a inphut palai kahong sik hei; Ethiopia mihei Pathen derna ankut anhong mado sik.

³²Pathen hneng hla sak ruh, vânhnōia rengramhei, RŌNGPU choi manshângna hla sak ruh,

³³bōirōk chunga akachōngpa, tenlaia bōirōk a. Rahnaktak a khōtlâng a-ôn so rangei ruh.

³⁴Pathen hratna kha hrimanthang ruh; ama lulenna kha Israel chunga ka-om, aratha neina kha bōirōk heia ka-om.

³⁵Ahmun inthenga inphut ahei sōk pha Pathen kha heituk a ṭit leh kaja ka-om mo, Israelhei Pathen kha! Ama’n amihei kha ratha hratna leh tlotorna apek hei. Pathen kha choi ka-ân ruh!