Read Komrem HLAHEI 72 Bible Online

HLAHEI 72 - Komrem bible

HLAHEI 72

¹Eh Pathen, reng kha nadikna vânga ṭong atanna sik a manthei roh, naṭongtan kadik kha chen neipui roh,

²kha achang inchu namihei chunga kadiktak a vai arôn sik, khana mi inrenghei kha’m kadiktak a a-en manhōi tor sik hei.

³Ram shunga nei leh hao pung rasoh; akadik kha leng rasoh.

⁴Reng khan kadiktak a sarahei chunga ṭong tan rasoh; khana akatlasam hei kha inthōpui hei rasoh khana ankasuk inrim hei kha torpek hei rasoh.

⁵Kani’n avâr asat lai seng, thla’n avâr apek lai seng, akahong sik khang rakip a nami he’n kamuk hei che rasoh,

⁶Rengpa kha hleipuk a khō kasûr kapō, tlâng kachâra khō cher-cher katla kapō ang rasoh.

⁷Ahringkhō shunga dikna kha khang ṭhak rasoh, khana thla’n avârlai seng nei leh hao pung rasoh.

⁸Arengram kha tui-ôngpui inkhat in inkhat a sunbit rasoh, Euphrates tuidunga inphut ralei inchaina katlung chang rasoh.

⁹Nêrdiram mihe’n a-âng kunga inkun sik hei; a’nrepuihei khan raleia anbinga inbok sik jo hei.

¹⁰Spain ram leh tuikekâk a renghei khan kutchoi anhongpek sik, Sheba leh Seba reng he’n kutchoi anhongpek sik.

¹¹Rn rakip ahmai kunga inkun sik hei, jât rakip in ama anrazen sik.

¹²Ama kabek sarahei, khana akatlasam leh donmak hei kha ahuk hei.

¹³Ama’n akatlasam leh sarahei lungsetna anei hei; akatlasam hei hringkhō ahuk hei.

¹⁴Anmani kha suk manbōina leh invōk-inthat a inphut ahuk hei, anhringkhō kha ahnenga mankatamtak hei kae.

¹⁵Reng kha ahringsei sôt rasoh! Sheba ram a sana kha ama pek hei rasoh; ama sik a derna ahei tik a neipek hei rasoh; Pathen mahâmṭhatna achunga tlungṭhak rasoh!

¹⁶Aram shunga khan sâng leh be siptak rasoh; Lebanon ram kara kaṭha kapōa, hmebunghei kha sâng leh be’n makhu rasoh. Hleia kahar kahmông kapōa, akhōpui shung kha mihe’n siptak hei rasoh.

¹⁷Rengpa rahming kha mahngia om hêrmak rasoh; arahming inthang kha kani a-omlai seng om rasoh. Pathen in rengpa vâng apek kapōa vângṭhat apekna sik hei, jât rakip in Pathen hneng inder hei rasoh.

¹⁸Israelhei Pathen RŌNGPU kha choi ka-ân ruh! Ama rōk in hiva det-hla hei hi atlosōt kae!

¹⁹Arahming kalûr kha ahei tik a choi ka-ân ruh! Alûrna khan raleichung sipsō rasoh. Amen! Amen!

²⁰Hivahi Jesse sapa David derna achaina kae.