Read Komrem HLAHEI 74 Bible Online

HLAHEI 74 - Komrem bible

HLAHEI 74

¹Eh! Pathen, heisa mo hing hinna nadahlon jo ung? Namihei chunga ahei tik a, nahnuk namannat ṭhak sik jo mo?

²Hmalaia inphut nang sik a nakadei jo hei, hmalaia inphut nata sik a nakadeisōt hei, naphung manchang sik a, ansōk changna inphut najōng ṭhōisōt hei, namihei kha mandonsōt hei roh. Vōi khat a nalei omna Zion kha mandonsōt roh.

³A’nsuksetpet jo khōpui he’m valôn ina va-en roh; kan-inrepui he’n Bek-inn shunga heirakip ansuksetpet jo.

⁴Nang inrepui he’n nabek-inn shunga, kantor jo tia ka-ông hei; khana antorna kha malârna, pōnlek hei anphun joa kae.

⁵Anmani kha hreicha vâng thing katuthlek mihei anpō.

⁶Kot-ke thingpek rakip kha hreicha leh, hreikhup vânga antuk manchip jo hei.

⁷Nabek-inn kha anvōkkhōia hmei vâng anro jo; nang kamukna hmun kha anmanbōk sō jo.

⁸Pui katluk a suk manhmang sik a anmadu ung, ram shunga hmun intheng rakip kha hmei anro sō jo.

⁹A’ntheng mêrchîkna kanneinâk rakip um om mak jo; sânkathem inkhatbek um indahlon mak jo, khana hivahi heituk kasôt sik mo tûte’num manhret mak hei.

¹⁰Eh Pathen, kan-inrepui he’n heichen mo sem antalamanlo sik che? Narahming kha ahei tik chen a antahnōise ṭhak sik jo mo?

¹¹Heisa mo keini inthōpui sik hi akahnōm mak che? Heisa mo nakut kha nakahnung ting napinsui jo?

¹²Tâk-kha, nang chu akungbia inphut kanreng hongkachang che, Eh Pathen; hmun katamtak a nang in naleihuk jo ung.

¹³Nahratna vâng khan tui-ôngpui naṭhen tor, khana tuipui shunga khōhri hei lu navōkkhōi tor.

¹⁴Nang in tuipui shunga khōhripa Leviathan lu kha nasuk manchip, ataksa kha nêrdi kâra shahei tasâk sik a napek hei.

¹⁵Nang in tuiri kapût leh tuisi namanlōng hei; khana tuidung kalenhei kha’m namanchâr hei.

¹⁶Nang in sûn leh jân nasyemsōt; khana kani leh thla hei kha anhmun et a nada hei;

¹⁷nang in ralei chaina, kekung keler nasyem; khana khōlum leh phebi um nasyem.

¹⁸Tâk-kha na’nrepui he’n anmanuisōna che kha mandon roh, O RŌNGPU, anmani chu Pathen neimak hei, khana nang anhnōise chea kae.

¹⁹Inṭangpui kase namihei kha, an-inrepuihei hneng dahlon mak hei roh; suk manrim jo namihei kha mahngi mak hei roh.

²⁰Keini leh intepna nasyem kha mandonsōt roh. Ram shunga rakir inthimna rakip a khan innâk-insena ka-om jo.

²¹Mi tamanrim jo hei kha inzakna manchen mak hei roh. khava sara leh akatlasam hei khan choi ka-ân hei che rasoh.

²²Eh Pathen, thōi ina nadikna kha hrung roh! Khōvel he’n sûn nilun antamanuisō che kha mandon roh!

²³Na’nrepui he’n hnuk kana tak a an-ôngna, nakadōihei bângtik neilo rasa inhrek kha mahngi mak roh.