Read Komrem HLAHEI 76 Bible Online

HLAHEI 76 - Komrem bible

HLAHEI 76

¹Pathen hi Judah ram shunga manhretna annei, arahming hi Israel ram shunga kajana annei.

²Jerusalema omna inn anei; Zion Tlânga ama ka-om.

³Khana khan inrepuihei thepui hei, anphō leh anchem hei, kadik, anhmangchâk rakip kha ador thlek pek hei.

⁴Heituk a akalûr che mo, Eh Pathen! Tlâng chung heia inphut najōng inlea khava hmun a nakadōihei nator hei kha heituk a kaja ka-om che mo.

⁵Anremi kahrânghei kha anhei rakip akasut-reng jo hei, khana tûnchu kathi jea kaje jo hei; anratha neina leh anthemna kha hnemna kase kae jo hei.

⁶Jacob Pathen nang in nahong maṭhit jo hei pha, shakorhei leh ankachōng hei kha kathi ri hei.

⁷Tâk-kha, RŌNGPU, nang chu mi rakip in anṭit che. Nahnuk anat pha nahmai kunga tûte ngir tor mak.

⁸Marvâna inphut naṭongtan najōng manhmu hei; vânhnōi in aṭit a kadai hngera ka-om,

⁹raleichunga suk manrim rakip huksōtna sik a, naṭong tanna kaphôngsōt sik a, nahong ngir sōt pha khan chu.

¹⁰Mihring hnuk natna khan nang choi manshâng chetna ahong rôn sōt a kae; Re shunga ahong kahringhei khan nang rehōihei kha annit sik.

¹¹Na’ntepna kha na-RŌNGPU Pathen hneng pek roh; akahnaia ka-om jât rakip in ahnenga kutchoi heichoi ruh. Mi rakip in anṭitna sik a Pathen in atlo;

¹²a’nlensak rengsahei kha amansinsak hei, akalen renghei kha amaṭhit manpir hei.