Read Komrem HLAHEI 78 Bible Online

HLAHEI 78 - Komrem bible

HLAHEI 78

¹Kamihei, kaman theina chei hi rangei ruh, kaṭong hrina hin nanmalung manhlut ruh.

²Ke’n mikasinghei ṭonghri hei kha kahmang sik, khana hmalaia ṭong in-ip hei kha kahri manchên sik,

³nitheisa leh nimanhretsa nipu-nipa he’n anta leihripek jo me hei kha kae.

⁴Khahei kha kansahei hnenga hripek loa damak ning; RŌNGPU ratha hratna leh aṭōntlo kalenhei, khana ṭōn-inlak aleitlo hei chunga, abâna khangtherhei hneng kanhri pek sik hei.

⁵Ama’n Israel mihei hneng dân apek hei, khana Jacob vonchoi hei hneng ṭongpek apek hei. Anvonchoi hei hneng dân kha anmantheina sik nipu-nipahei hnenga ṭong aleimanse hei,

⁶khavakha abâna khangther he’n anhong manhret a ansahei hneng anmanthei nôkna sik heia kae.

⁷Hing’hin anmani’n antaksenna kha Pathen chunga anda sik, khana ama ṭōn leitlo hei kha mahngi mak jo hei ning; tâk aṭongpek-hei kha ahei tik a anjui sik jo.

⁸Anmani kha anpu anpahei rahe kase leh ṭong kajuimak, Pathen taksenna kahnet hêrmak khana ahnenga taksenthei kachangmak hei kapō kha anchang makna sik a kae.

⁹Ephraim mihei, sai leh the intu hei, re ning khan chu katlân jo hei.

¹⁰Pathen leh anṭong intepna kha leijui mak hei; ama dân jui sik kha leihnōm mak hei.

¹¹Aṭōn leitlo hei khana aṭōn inlak leitlo hei antahmu kha anmahngi jo.

¹²Egypt ram Zoan phaichama anpu anpa he’n anlei en mathliplai khan, Pathen in ṭōn-inlak aleitlosōt.

¹³Ama’n tui-ôngpui kha aleikhōi ṭhenna ashunga aleiṭhōi hei; ama’n tui kha bang kapōa aleimanngira kae.

¹⁴Sûna sumtuk vâng aṭhōi hei, khana jân kathang hmeihlom vâng aṭhōi hei.

¹⁵Nêrdiram hlungpuihei kha amankikkhōi hei, khava shunga inphut tui aleipek hei.

¹⁶Hlungpuia inphut kava tuidung amanlōng, tuidung kapōa tui amantlân.

¹⁷Tâk-kha Pathen kadōia setna antloṭhak, khana nêrdiram A’nshângpen kha an-in erpui.

¹⁸Anmani’n Pathen kha enmansinna sik mônga antamadudu sâk derna anleinei.

¹⁹Pathen dekna anmani’n hing’hin anhri. “Hiva nêrdiram kâra hin Pathen in sâk sik thlai adôntor sik mo?

²⁰Hiva hichu kadik, hlungpui kha avōk a tui rahnak a amanlōng; tâk ama’n eini sik a buhlom leh amihei sik hme apektor sik me mo?”

²¹Khang’khan antahri kha Pathen in athei pha ahnuk kana jo; amihei kha hmei vâng abuhlu jo hei, khana anchunga ahnuknat kha akhechet jo,

²²ajârchu achunga taksenna neimak hei khan chu ama’n ahuk sik hei ti kha leitaksen mak hei.

²³Tâk-kha ama’n chunga bōirōk hneng ahri khana akot mahlangna sik ṭong aleipek;

²⁴ama’n marvâna inphut hmuchi ajōng pek hei, antasâk sik manna ajōngtir pek hei.

²⁵Khang’khan marvân ngevahei bu kha anleisâk jo, khana Pathen in antamadu rakip aleipek hei.

²⁶Khana ama’n nisō thli kha amanhrânga, khana ahratna vâng thlang thli khan thlisip amanher;

²⁷khana amihei hneng vahei kha ajōngtir pek hei, tuipanga nêrdi ja kapōhrep ajōngtir pek hei;

²⁸Anrephōr, anpōn-inn kimve heia jōngkatla hei.

²⁹Khang’khan mihei khan anleisâk a leikakhop hei; antamadu kha Pathen in aleipek hei.

³⁰Tâk-kha anmani lôpna khachu khoptik neimak hei, khana anleisâk kakenga kae,

³¹Pathen kha ahnuk ahong nat jo pha, Israel mikahrat pepen hei, khangdông akaṭha pepen hei aleithat pek jo hei.

³²Kha aleichang jo’num mihei kha leikaset kakeng hei, khan chu aṭōntlo inralak-hei kha taksen dekmak hei.

³³Khava jâra anmani kanihei kha kaphuk masa inkhat kapōhrep a, anhringkhō kha sōkphutrōia khōdeng mantheina vâng aleimanchai pek hei.

³⁴Mi ṭhahrep athat hei kataia, alakseng hei khan ahnenga ho’nle hei; anmalung anthlenga, malung kahluttak a anhongder sik.

³⁵Pathen kha ankahrung kae, khana Akahratpen kha ankabôma akahong kae tia anleimandonsōt.

³⁶Tâk-kha anṭonghri hei chu maleisei rōk kae; malung inthenga antahri inkhatbek om mak.

³⁷Anmani ahnenga kajatak a juimak hei; ama leh an-intepna chunga taksenthei changmak hei.

³⁸Achang ravâng Pathen inchu amihei alungset hêr hei. Ansetna arangei mandam hei, suk manhmang mak hei. Pha katamtak ahnuknat kha akei male, ahnuk inthak kha aleikhâm.

³⁹Anmani hi thli ahrângsōa a’nhmangbât kapōa akathi inhmangthei mihei kae ti amandonsōt hei.

⁴⁰Hmun heija hrep mo nêrdiram a khan ama anta’nrepui; Vōi heija mo amalung anta leimanchâm jo!

⁴¹Ave-avea Pathen kha enmansinna anleinei khana Israelhei Pathen Inthengpa kha ahnuk anleimannat.

⁴²Aratha hratna kha anleimahngi an-inrepuihei kut a alei huksōtna kanihei,

⁴³Egypt ram Zoan phaichama ahratna leh ṭōn inralak aleitlo hei kha anleimahngi jo.

⁴⁴Tuidunghei kha thisen aleimanchang, Egypt sahe’n tui in sik leinei mak hei.

⁴⁵Ankâra mathōi atir pek hei, khōdeng amanthei hei, khana uṭok hei amanpunga, anhleihei amanhmang pek hei.

⁴⁶Anhmuchi kara kasâk sō sik a, anhlei inhmangsō sik a khâikhuhei ajōngtir pek hei.

⁴⁷Anvomhrui hei kha kahre vâng adeng thatsō pek hei khana antheichang kunghei kha kavur vâng athatsō pek hei.

⁴⁸Anranhring hei kha kahre vâng amandeng hlonpek hei, khana anran rup-hei kha khō inphe vâng athatpek hei.

⁴⁹Kathi ṭong karônpa inkhat kapōa, ahnuknat inhnak kha ajōng bunthlōn heia, amanreng hêr hei.

⁵⁰Ahnuk natna kha keimale mak joa, khana anhringkhō kha ṭhenpek mak hei, tâk natse vânga aleithat manram hei.

⁵¹Egypt ram innshung rakip a sapase upahei kha aleithat hei.

⁵²Khava pha kemōng kakhempa kapōa amihei kha aṭhōisōt jo hei, khana nêrdiram a hlam aleikei hei.

⁵³Kahring kadamtak a aching hei, khana ṭitna leinei mak hei; tâk an-inrepuihei khachu tui-ôngpui in avûrsi jo hei.

⁵⁴Ama khet in aleitorna Zion Tlâng ram inthenga khan ajōngṭhōi hei.

⁵⁵Amihei anhongpung dungjuia aleika-om mihei kha ahnong sōt pek hei. aram kha Israelhei kâra asempek hei khana an-innhei kha amihei aleipek hei.

⁵⁶Tâk-kha Akahratpen Pathen kha anleidōi jo, khana anlei enmansin jo. Aṭongpek-hei leijui mak hei,

⁵⁷anpu anpahei kapōa rahe kase leh ṭong kajuimak kae jo hei, thepui intlunmak kapōa taksenthei changmak hei.

⁵⁸Lim kamukna hmun ansyem jâra khan ahnuk anhong mannat, khana anlimsyem vâng khan ahnuk anmanthak hêr joa kae.

⁵⁹Pathen in khahei kha ahmu pha ahnuk kana jo, khava jâra amihei kha pui katluk a ahlon sōt jo hei.

⁶⁰Nikâra aleiomna Pōn-inn kha Shiloa adahlon jo.

⁶¹Ni’nrepuihei khan Intepna thingrakōng, alûr leh alen malârna kha, antakasut sik a aphe jo.

⁶²Amipuihei chunga ama ahnuk kana jo, an-inrepui he’n antathat sik hei aphe jo hei.

⁶³Anrether hei kha remi he’n anthat jo hei, annuhngâk-hei kha anka-ompui sik tûte om mak jo hei.

⁶⁴Thempuhei kha chemjâm vâng kathi jo hei, anrenghmei hei kha ṭajai mansui mak jo hei.

⁶⁵Achaina pena RŌNGPU kha akajea inphut, mi kahrattak ju inruia ahon’sang kapōa hongkathōi jo.

⁶⁶A’nrepuihei kha ahnong malepet jo hei, ahei tik a torna leh inzakna apek jo hei.

⁶⁷Tâk-kha Joseph sōnhei khachu ahlon sōt jo hei; Ephraim phunghei kha’m kadei mak jo hei.

⁶⁸Khava kahlânga ama’n Judah phung leh lungset aleirôn Zion Tlâng kha akadei jo hei.

⁶⁹Khana khan marvâna a-inn kapōa, a-Bek-inn kha asak jo; ralei kangar kapōa kahnettak a asyema, pha rakip a inhukna ka-om jo.

⁷⁰Ama’n asōk David kha akadei jo; ram thōia inphut ajōng ṭhōisōt,

⁷¹akemōng khemna inphut, Israelhei reng kha, Pathen mihei kakhempa amanchang jo.

⁷²Anmani kha David in abinga sik mandon loa lungri tak a leh insing theitak a aleiching hei.