Read Komrem HLAHEI 83 Bible Online

HLAHEI 83 - Komrem bible

HLAHEI 83

¹Eh Pathen, sip atipek mak roh; omhnâm mak roh, kadâi hngera a-ompek mak roh!

²Enroh! nang inrepuihei khan re antlo jo, khana nang kahōt hei khan dōina antlo jo.

³Namihei dekna anmani’n marûk a ṭōn anmantluk; nang in nakhâr hei dekpuina ṭōn marûk a anmantluk jo.

⁴“Hong ruh, anmani jât hi sukset hei rih; Israel hi ahei tik a mahngi achangna sik,” tia anhri.

⁵Anṭōn mantluk a khan inhnōm et hei; nang kadōi sik kha inchunna annei jo:

⁶Edom leh Ishmael mipuihei; Moab leh Hagrit mipuihei;

⁷Gebal, Ammon, Amalek mipuihei, khana Philisti leh Tyre hei.

⁸Lot sōn Ammon leh Moab-hei rup kahrat shunga Assyria he’m hong inveisa hei.

⁹Kishon tuidunga Media hei, Sisera leh Jabin hei chunga naleitlo kapōa khan tlo hei roh.

¹⁰Endora khan naleitor hei, antaksa kha raleia leikaṭop heia kae.

¹¹Oreb leh Zeebhei hneng naleitlo kapōa, anre hlamkakeihei hneng tlopek hei roh; Zeba leh Zalmunna hei naleitor hei kapōa, anre hlamkakeihei kha torpek hei roh,

¹²“Pathen ram rakip hei hi niram nimanchang sik kae” kati loihei kha kae.

¹³Eh! Pathen, thli’n asem manjōng sapôt kapōa, vaiphin kapōa kathek manchek hei roh.

¹⁴Ratu kha hmei ahong kakâng kapōa, hmebung kha hmei male’n ahong sur jo kapōa,

¹⁵thli inhnak vânga khan manṭit hei roh, nathlipui thlihrem vâng khan manlōisōt hei roh.

¹⁶Anhmai kha inzakna vâng makhu pek hei roh, O RŌNGPU, naratha hratna kha anhong manhretna sik a tlo roh.

¹⁷Anmani kha tor a om hei rasoh, ahei tik a ṭit-inpirna chen hei rasoh; hme kasetak a thi hei rasoh!

¹⁸Anmani’n nang rōk kha RŌNGPU che kae, raleichung pumpuia ratha kaneipen vaikarôn che kae ti kha manhret hei rasoh.