Read Komrem HLAHEI 88 Bible Online

HLAHEI 88 - Komrem bible

HLAHEI 88

¹RŌNGPU Pathen, ani kahuksōtpa, sûn nilun kaṭap eng; khana jân a nahnenga kahong eng.

²Kaderna arangei pek roh; Inthōpui madu jâra kaṭapna hi athei pek roh!

³Khōdeng theina hingja kachunga a-om jo jâra, thina khan ahnai jo eng.

⁴Akathi sik a ka-om mihei kha leh in-ang jo eng. Karatha hi’m katlangsō jo.

⁵Akathi kâra dahlona ka-om jo eng; namahngi cher jo eng, nang inthōpuina chenphâk loa, that a thlânkhura akaje hei kha ka-ang jo eng.

⁶Nang in thlânkhur inthûk shunga khan nahlon mathlâk jo eng; a’nthukpen khana a’nthimpen kōk shunga khan.

⁷Nahnuk natna khan kachunga kahriktak a ade eng; khava kahu thōia khan akahnur mannōi eng.

⁸Kaṭhōnhei nani mandahlon jo eng; anmani inngeipui mak naman chang jo eng. Kei kekhuma ka-om jo eng, khana inphut sōk tor mak jo eng;

⁹inreng jâra, kahmit hmu katlasam jo. RŌNGPU ani katai kabek che, khana kakut kamadoa derna kanei che!

¹⁰Akathihei sik a ṭōn inlak-hei natlo mo? Anmani ahong kathōi heia anta hongchoi ka-ân che mo?

¹¹Nalungset inthlengmak kha thlânkhura a-emak leh taksenthei nachangna kha suk manhmangna ram a khan anhrisōt mo?

¹²A’nthim hmun a khan naṭōntlo inlak-hei kha anhmu mo, a-emak leh khava mahngi sōtna ram khan naṭhatna kha a’nlâr mo?

¹³RŌNGPU, inthōpui madu jâra kabek che, jîngkâr katai kader ṭhak che.

¹⁴Heisa mo nahlon sōt eng, RŌNGPU? Heisa mo na’nthupde eng?

¹⁵Kasintea khōdeng kahong thei jo, thina kha kaleihnai jo, nakarâkna eng phurhrik khan kaṭōiber jo eng

¹⁶Nahnuknat khan amannōi jo eng. Nabuhluna eng inhnak khan asukset jo eng.

¹⁷Khahei khan sûn nilun tuishânglen takachûm kapōa ani kavursi eng; arakir rakip a anhonghnai khum jo eng.

¹⁸Kaṭhōn inhnaipui hei katlunga nani mandahlon jo. inthim rōk kha kei ṭhōn naman chang pek eng.