Read Komrem HLAHEI 89 Bible Online

HLAHEI 89 - Komrem bible

HLAHEI 89

¹O RŌNGPU, nalungset inthlengmak kha hla vâng kasak ṭhak sik; taksenthei nachangna kha ahei tik a kahri manthang sik.

²Nalungsetna kha ahei tik a ka-om ṭhak sik ti kamanhret, ti chu taksenthei nachangna kha chungvân kapōa ka-om ṭhak a kae.

³Nang in nati, “Ke’n kakadeisōt jo mi kha leh ṭongtepna kanei jo; kasōk David hneng intepna kanei jo.

⁴‘Nalungdotak sōn inkhat khan reng kachang ṭhak sik; Nareng innshung kha are-rea kadaṭhak sik.’”

⁵Naṭōntlo inlak-hei kha marvân he’n hla vâng ansak; mi intheng he’n taksenthei nachangna kha hla vâng ansak, RŌNGPU.

⁶Marvâna nang kapō tûte inkhatbek om mak, RŌNGPU; marvâna ka-om inkhatbek in nang in-angpui om mak.

⁷Mi intheng hei intûpna khan nang ankaja che; khana nang kajana ankhenga inding hei.

⁸Chunghnung RŌNGPU Pathen, nang kapō akahrat tûte om mak; heirakip a taksenthei che kae, O RŌNGPU!

⁹Tuipui kahrat chunga nang in vai narôn; hnuk kase atui in-nông kha namandai.

¹⁰Nang in Rahab khōhripa kha nakahnura nathat jo; naratha hratna vâng khan na’nrepuihei nator hei.

¹¹Marvân hi nata kae; ralei hi’m kae. Nang in vânhnōi leh ashunga ka-om rakip nasyem hei.

¹²Sak leh thlâng hei hi’m nang in naleisyem hei; Tabor Tlâng leh Hermon Tlâng he’n namanpâkna hla ansak.

¹³Heituk a ratha kanei che mo! Naratha hratna hi heituk a akalen jo mo!

¹⁴Narengram kha malung intheng leh ṭongtan kadik vâng inphunsōt; naṭōntlo rakip a lungset leh taksen ka-om hei kha inlâra kae.

¹⁵Hla leh inṭhōia nang inmuk hei kha heituk a akahōi hei mo, nalungsetna vâr shunga aka-om hei kha!

¹⁶Nang jâra anmani sûn nilun inpâk hei, khana naṭhatna jâra anchoi ka-ân chea kae.

¹⁷Nang in torna kalen tatak napek ung; nalungsetna shunga chung namansōk ung.

¹⁸O RŌNGPU, nang in kankahrung sik nakadeipek ung; Israelhei a’ntheng Pathen nang in kanreng kha napek ung.

¹⁹Hmalai khan, nang in nahlamrin nasōkpa hneng hmangtalâra naleihri, “Rekahrat inthang inkhat hneng inthōpuina kaleipek; mipui kâra kadeisōtpa hneng khan ke’n len in-ongna kapek jo.

²⁰Ke’n kasōk David kha thai intheng kamanthia reng kamanchang jo.

²¹Kahratna khan ama athlopṭhak sik, karatha neina khan ama amanhrat sik.

²²A’nrepuihei khan ama kha tor hêrmak hei ning; mikaṭhamak-hei khan tor mak hei ning.

²³Akadōihei kha ke’n kakahnur pek sik hei, khana ama kahōt rakip kha kathatpek sik hei.

²⁴Ke’n ama kha kalungset sik khana ka’nthōpui ṭhak sik; ama kha akator kamanchang ṭhak sik.

²⁵Mediterranean tui-ôngpuia inphut Euphrates tuidung katlung arengram kha kamanlen pek sik.

²⁶Ama’n kahnenga, “Nang kapa leh ka-Pathen che kae; kakasan leh kakahukpa che kae,” ati sik.

²⁷Ke’n ama kha kasapa ahma inkei, reng rakip kâra, akalenpen kamanchang sik.

²⁸Ahnenga ka’ntepna hui kamathlung sik, khana achunga kaṭong tepna ahei tik a ka-om ṭhak sik.

²⁹Ama reng innshung vairônna kha marvân kapōa ka-om ṭhak sik, alungdo sōn inkhat in reng kachang ṭhak sik.

³⁰“Tâk-kha ama sōnhei khan kadân kha anjuimak inchu, khana kaṭong pek dungjuia an-om mak inchu,

³¹kamansena hei kha hei ansakmak inchu, khana kaṭong pek hei kha anjuimak inchu,

³²ansetna jâra khan ke’n karâkna kapek sik hei, khana anṭhe jâra khan kamanreng sik hei.

³³Tâk-kha David kalungsetna chu bângmak ning, khana ka’ntepna kha juiloa haimak ning.

³⁴Ama leh kei intepna kha sukkhōi mak ning khana ahnenga ka’ntepna kha inkhatbek um losōt male mak ning.

³⁵“Vōi khat rōk a ahei tik a sik karahming intheng vâng, intepna kanei jo kha: David hneng kamalei seihêr mak ning.

³⁶Ama’n sōn leh pâr aneiṭhak sik, khana arengram kha kani’n avâr asat lai seng kahrung pek sik.

³⁷Khavakha bōirōk a hlamrin ka-om tak sâkhi thla angir kapōa kahnet a ka-om ṭhak sik,” nati.

³⁸Tâk-kha nang chu nakadeisōt rengpa chunga nahnuk kana; nahnong sōt jo khana nahlon sōt jo.

³⁹Nasōkpa leh nan-inhnōmna kha navōkkhōi jo, khana alenlukhu kha bōnthlōk kâra nahlonpek jo.

⁴⁰Akhōpui kalen banghei kha navōk khōia naman chimpek jo, khana arekur kha insuk inhmanga nadapek jo.

⁴¹Khava hnenga kahro rakip khan aneinâk kha anmarûk jo; akhō leh ven he’n sem tlona annei jo.

⁴²A’nrepuihei kha torna namannei jo hei; anmani hei seng kha inpâkna namannei jo hei.

⁴³Are hmangchâk-hei kha hnemna kase naman chang pek jo; khana re shunga mi’n ama kha namantor jo hei.

⁴⁴Areng khōnghre kha nalosōt pek jo, khana areng in-ongna kha raleia nakanok mathlâk jo.

⁴⁵Aphaloa namanter jo, inzakna kha achunga namakhusi jo.

⁴⁶RŌNGPU, ahei tik a a’nthup sik che mo? Heitik katlung mo nahnuknat kha hmei kakâng ka-ang ṭhak sik?

⁴⁷Mandon roh, kahringkhō hi heituk a kabong mo; kankhenga akathitheia nasyem ung hi mandon roh!

⁴⁸Tu mo thilo hêra akahring ṭhak a ka-om tor sik? Heikhong mo mihring in anbinga thlâna inphut a’nphesōt thei sik hei?

⁴⁹RŌNGPU, hmalaia nalungsetna manchênna hei kha khō jo hei mo? David leh naṭong intepna hei kha khō jo hei mo?

⁵⁰Heikhong mo nasōk ke’n inzakna kahmu hei, Pathen inhret mak hei hâksêrna rakip kalei thōkna hei kha mahngi mak roh.

⁵¹O RŌNGPU, na’nrepuihei khan nareng kadeipa kha inzak anpek! Asena hmun rakip a anmanzak jo.

⁵²RŌNGPU kha ahei tik a choi ka-ân ruh! Amen! Amen!