Read Komrem HLAHEI 92 Bible Online

HLAHEI 92 - Komrem bible

HLAHEI 92

¹RŌNGPU, nahnenga inpâkna pek hi nang kajana hla sak hi heituk a akaṭha jo mo, Eh A’nshângpen Pathen,

²nalungset inthlengmak kha jîngkâr katai, taksenthei nachangna kha ajân katai phôngsōtna kha,

³ahrui indo hlasakna hmangchâk khana mahring kahōi ṭingṭang vâng choi manshângna kha.

⁴O RŌNGPU naratha neina ṭōntlo khan inpâkna apek eng; naṭōntlo jâra khan inpâkna hla kasak a kae.

⁵Naṭōn tlohei kha heituk a akalenhei mo, RŌNGPU! Namandonna hei kha heituk a a’nthuk hei mo!

⁶Hivahi mikamo tamanhret theimak kha kae; lungri kaneimak mi’n ṭhensōt tor mak:

⁷mikaṭhamak kha hardông kapōa hongkakek thei, akaṭhamak katlohei khan anhongnei sik; achang ravâng anmani kha suk manhmang pet sik hei kae,

⁸ajârchu RŌNGPU, nang chu ahei tik a akahratpen che kae.

⁹Na’nrepuihei kha kathi sik hei, khana mikaṭhamak heirakip kha’m natorsō sik hei ti kanmanhret.

¹⁰Nang in ram sehratche kahrat hei kapōa nasyem jo eng; inpâkna vângṭhat napek jo eng.

¹¹Ka’nrepuihei tor a an-om kha kahmu jo, khana mikaṭhamak-hei ông rasa kha kathei jo.

¹²Mikadik-hei khachu kahno kung kapōa kakhang sik hei; Lebanona cedar thingkunghei kapōa kakhang sik hei.

¹³Anmani kha ni-Pathen bek-inna akakhang RŌNGPU inna antaling thingkung kapō hei kae,

¹⁴khahei khan anter katlunga inra ṭhak heia anbō in-êm ṭhak a kangar tak a aka-om kapō hei kha kae.

¹⁵Hivahin, RŌNGPU kha kadik, khana kei kahrungpa hi ṭhena neimak ti amalâr.