Read Komrem HLAHEI 94 Bible Online

HLAHEI 94 - Komrem bible

HLAHEI 94

¹RŌNGPU, mi karâkna kapek tor Pathen inkhat che kae; nahnuknat kha malâr roh!

²Mi rakip ṭongkatan kha nang che kae; thōi ina mi inlensak-hei sik rahōi kasōk chen kha pek hei roh!

³Mikaṭhamak-hei khan heichen katlung mo ala’npâk sik hei? Pha heichen katlung mo, RŌNGPU?

⁴Heichen katlung mo ṭōnse katlohei kha ala’nlensak heia, khana anṭōnse tlo jâra a’nhri inṭha sik hei?

⁵RŌNGPU, namihei kha anrachi kahnur hei, namihei kha khōdeng anmanthei hei.

⁶Anmani’n renghmeihei leh nu leh pa kase anthat hei, khana kanram khōhme ka-om hei kha anthat hei.

⁷Anmani’n, “RŌNGPU’n eihmu mak; Israel Pathen khan manhret mak,” anti.

⁸Kamihei heituk-hrep mo khanga lungri kasea akamo chei? Heitik leh mo manhretna nantanei sik?

⁹Pathen in nikōrhei asyem-theiloa ama aka-om mo? Ama’n nihmit hei asyem-hmuloa ama aka-om mo?

¹⁰Ama’n jât-hei arasei hei — karâkna pek loa ada sik hei mo? Ama mi rakip hei oja kae — manhret loa ama aka-om mo?

¹¹RŌNGPU’n nimandonna amanhret; anmani mandonna ajâr kasehei kha amanhret.

¹²RŌNGPU, nang in namanse hei, nadân namanthei mihei kha heituk a akahōi hei mo?

¹³Inrengna anthōk pha châmhngatna napek hei mikaṭhamak-hei khumna sik khur nacho mak kârseng.

¹⁴RŌNGPU’n amihei kha dahlon mak hei ning; ama tahei kha donloa damak hei ning.

¹⁵Ṭongtan hmun heia akadik kha inhmusōt nôk sik, khana mikadik rakip hei khan anmajôm sik.

¹⁶Mikaṭhamak-hei kadōia kei anikangirpui kha tu mo? akaṭhamak katlohei indōipuina khan tu mo kei langting akangir?

¹⁷RŌNGPU’n anile’nṭangpui mak inchu, sip tina ram a inranga leikase sik jo eng.

¹⁸“Katlû jo eng,” kalei ti; tâk O RŌNGPU, nalungset inthlengmak khan akei mathō eng.

¹⁹Malung inkei-chioa, inrengtak a kalei omlai khan lungmōng nathlâk enga inpâkna napek eng.

²⁰Akadik mak a ṭongkatanhei, akadik mak kha indik hei

²¹mikaṭhahei chunga ṭhatmak ṭōn intluk hei khana ṭhenakase hei thatna sik a ṭong inthlâk ṭongkatanhei kha leh nang hrui heite neimak che.

²²Tâk-kha RŌNGPU’n kei asan eng; ka-Pathen in kei ahrung eng.

²³Anmani chu anṭhatmak jâra khōdeng amanthei sik hei, anset jâra asuk manhmang sik hei; RŌNGPU, ni-Pathen khan asuk manhmang sik hei.