Read Komrem ṬONGCHÎK-HEI 1 Bible Online

ṬONGCHÎK-HEI 1 - Komrem bible

ṬONGCHÎK-HEI 1

¹David sapa, Israelhei reng, Solomon ṭongchîk-hei.

²Singna leh ṭongpek kaṭha manhretna sik khana ṭong inri manhretna sik a nankabôm sik ṭongchîk-hei kha hin ka-om hei.

³Heikhonga mo kasing tak a om sik, malung mantheng sik, khana heikhonga mo kadik leh kaṭha om sik ti kha hihei hin anmanthei tor sik chei.

⁴Heite ala’nhretmak kha amansing thei, khana khangdônghei kha heikhonga mo singna leh kara katluk a antanei sik ti kha amanthei tor hei.

⁵Hiva ṭongchîk-hei hin mikasinghei hnenga kapha themna apeksator khana lekha kathemhei kha’m hlam akeitor hei,

⁶khana inphut anmani he’n a’nthup a ka-om ṭongchîk-hei kha heitina hei mo ti kha anmanhret tor a mikasing, mikathemhei ṭong heiphut hei kha anmanhret torna sik a kae.

⁷Themna chenna sik a ahma inkeipena RŌNGPU kha nakaja sik kae. Mikamo he’n singna hi heitea sakmak hei, khana themna sik inchu hnōm mak hei.

⁸Kasapa, nanu napa mansena che khan namalung manhlut roh.

⁹Lukôm kaṭha na’nkôm leh maṭhi na’n-or pha nahme akaṭhadet kapōa, anmani mantheina hei che khan na-omchen anmanṭhatdet pek sik che.

¹⁰Kasapa, mikaset he’n anhei jôrche pha hnōmpek mak hei roh.

¹¹Anmani’n hinga anti thei, “Hong roh; mi that sik a vajong rih! Ṭhenakase hei vabuhlu hei me sona hōitheina nei rih!

¹²Anmani kahring kadam a ka-om hei, tâk nihlō jo he’nchu kathisō sik hei!

¹³Nei leh hao katamtak nichen sik khana inru neinâk kha ni-innshung heia kasiptak a nibuk sik hei!

¹⁴Hong roh kankâra hongtlâk roh, nihong marûk neinâk-hei kha nikhenga insempet sik me.”

¹⁵Kasapa, khava kapō mihei leh inṭhōimak ruh. Anmania inphut kahlatak a om roh.

¹⁶Anmani chu akaṭhamak tlo sik kha hngâktor mak hei, anmani chu ahei tik a mithatna sik a intluk hei.

¹⁷Nang in sur sik tia namantluk va khan nang ahmu che pupuma châng nakam kha ahnemna om mak,

¹⁸tâk khava kapō mihei khachu anthina sik anhmu pupuma anbinga an-in-ôkna sik châng ankama kae.

¹⁹Inru hin phat rakip a inrupa hringkhō amanhmang. Hing’hin, innâk-inse katlo rakip hei hringkhōa kasōk ria kae.

²⁰Rangei roh! Singna’n hlamlena leh neinâk jōrna keithea ka-om hei kha abek hei,

²¹rasa inhnaktak a khōpui kalen sōngkot hmun heia, mipui intûpna rakip heia, abek hei:

²²“Mikamohei! Heituk kasôt mo akamo alakachang hnōm chei? Heituk kasôt mo themna kha nanta lahōt sik? Ahei tik a’m inthemchûk hnōm mak chei mo?

²³Karasei che pha a rangei roh; ke’n ṭongpek kaṭha kapek sik che, khana kei themna kha chen kaneipui sik che.

²⁴Kahnenga hong roh tia kabek chea hme kalâk che, tâk nang in rangei mak che. Kabekna che hin namalung hlutmak.

²⁵Kaṭong pek che rakip donmak che, khana naṭhena hei mandik pek che rong kati’num hnōm mak che.

²⁶Khava jâra khōdeng theina nachen pha, kamanuisō sik che. Ṭitna’n akatōm che pha sem kamanlo sik che.

²⁷Nachunga thlipui kapō ahong pha, inrengna thli kha ahong hrâng pha, khana nang in nat leh inreng naratō pha.

²⁸Khava pha nang in singna hi nabek sik. Tâk-kha ke’n masôn mak che ning. Hmuntina najong sik eng, tâk ahmu mak tin.

²⁹Nang in singna hmangje leimanhret hêrmak che, khana pha rakip a RŌNGPU ṭong jui sik leihnōm mak che.

³⁰Kaṭong pek leimadu tet mak che, khana naṭhena kamandik che pha’m namalung manhlut mak che.

³¹Achang jâra narahōi hrep kha naratō sik, khana naṭōntlo khan amannat sik jo che.

³²Singna hi andon mak jâra heite la’nhret mak hei kha kathihei. Mikamohei kha anbinga ngeitō makna khan athat manhmang hei.

³³Tâk-kha tu achang inum kaṭong inngei he’n inhukna annei sik. Ṭit sik neilo hêra kahōia ka-om sik hei.”