Read Komrem ṬONGCHÎK-HEI 10 Bible Online

ṬONGCHÎK-HEI 10 - Komrem bible

ṬONGCHÎK-HEI 10

¹Hihei hi Solomon ṭongchîk-hei kae: Sa kasing he’n anpahei inteina anmannei hei; sa kamo he’n annuhei malung anmanchâm.

²Malung intheng loa nahmu karōi khan nang sik a akaṭha tlosōt mak ning, tâk malung intheng in nahringkhō ahuk tor.

³RŌNGPU’n mikaṭhahei kha vonṭâma damak hei ning, tâk mikaṭhamak-hei chu antamadu kha manchen mak hei ning.

⁴Narathaset khan sara amanchang sik che, tâk ṭōn rahnak a tlo khan amannei sik che.

⁵Mandonna kanei mi khan sâng leh be akhôm pha hrep a amantûp, sakhôm phalaia jea om hichu inzak ka-om tak omchen kae.

⁶Mikaṭha he’n vâng anchen sik. Mikaṭhamak-hei ṭonghri shunga innâk-insena’m ashunga inveisa.

⁷Mikaṭhahei chu vângchen inkhat kapōa mandonṭhak a ka-om sik hei, tâk mikaṭhamak-hei chu inranga mahngi kachang sik hei.

⁸Mandonna kanei mihe’n mansena arahlâng sik. Kamotak a ṭongkahri lele hei chu inhmang sik hei.

⁹Malung intheng mihei chu kamōnga kadam senga ka-om hei, tâk malung intheng mak hei chu ansur sik hei.

¹⁰Akadik kahrimak mihe’n bōina anmasō, tâk inphôngtak a mi inkôk he’n inchamna sik antlo.

¹¹Mikaṭha ṭonghri khachu hringna tuikapût kapō kae, tâk mikaṭhamak ṭonghri khachu innâk-insena ashunga inthup a ada.

¹²Inhōt inter hin bōina amasō, tâk lungset in ṭhena rakip arangei mandam.

¹³Malung kasing he’n manhretna kadik kha anhrisōt, tâk mikamohei chu karâk sik hi anrangei.

¹⁴Mikasing in ator chenna themna kha ahmu, tâk mikamo he’n ṭong anhri’nchu inrengna kha kahlatak a om mak jo.

¹⁵Nei in mikaneipa kha akahuk; sara chang in sarapa kha asuk manhmang.

¹⁶Ṭōn kaṭha tloman chu hringna kae, tâk setna’n setna katamtak tlona sik aṭhōi me.

¹⁷Mi mandikna inngei hei kha kahring sik hei, tâk anṭhena chunga akahnōm mak hei kha inrimna shunga ka-om hei.

¹⁸Tu inkhat marûk a mi ka-en kada kha malei kasei kae. Tu mo inkhat titi ṭong kahrile kha mikamo kae.

¹⁹Ṭong nahri chenna setna natlosachet thei. Nasing inchu aka-om hnâm sik che kae.

²⁰Mikaṭha ṭonghri chu dangka intheng kapō kae; mikaṭhamak-hei mandonna chu hnemna kase kae.

²¹Mikaṭha ṭonghri hei khachu mi katamtak in hnemna anchenpui sik, tâk namôna beisōa khan nabinga inthat sik che.

²²Naneina kha RŌNGPU vângpek che kae. Ṭōntlo hrat khan nang manhaodet tor mak che ning.

²³Akadik mak tloa kahōi sak ti hi mikamo omchen kae. Manhretna kanei he’n singna ṭōna kahōi ansak.

²⁴Mikadik he’n antamadu kha anchen, tâk mikaṭhamak he’n antaṭitpen kha anchen sik.

²⁵Thlipui hong kahrânga, mikaṭhamak-hei khachu atlen hei, tâk malung intheng hei khachu ahei tik a huk a ka-om ṭhak hei.

²⁶Miratha kase kha naṭōn heikhat katlo sik a jonghêr mak roh; theithûr sâk a ha kakim kapōa a-emak leh hmit shunga hmeikhu akahlut kapōa natak amanhâng sik.

²⁷RŌNGPU ṭong kha jui roh, achang inchu nahringsei kasôt sik. Mikaṭhamak-hei chu anpha atluk mak hma kathihei.

²⁸Mikaṭhahei inhōrna khan inpâkna apek hei, tâk mikaṭhamak-hei chu hmating namtor mak hei.

²⁹RŌNGPU’n malung intheng hei kha ahrung hei, tâk akadik mak katlohei kha asuk manhmang hei.

³⁰Mikadik he’n ahei tik a inhrungna annei sik, tâk mikaṭhamak-hei khachu aram shunga hin hringmak hei ning.

³¹Mikadik he’n kasinga ṭong anhri, tâk akaṭhamak kahrisōt malei kha hip sik kae.

³²Mikadik he’n ṭonghri je anmanhret, tâk mikaṭhamak he’nchu malung tônna ṭong anhri.