Read Komrem ṬONGCHÎK-HEI 11 Bible Online

ṬONGCHÎK-HEI 11 - Komrem bible

ṬONGCHÎK-HEI 11

¹Atena kher kadikmak kahmang hei kha RŌNGPU’n ahōt hei. Malung inthenga akahrik kate hei chunga ama inpâk.

²A’nlensak hei kha inranga inzakna anratō sik. Insinsak a om hi singdetna kha kae.

³Mikaṭha nachang inchu, malung intheng in hlam akei che kae. Taksenthei kachangmak hei kha anbing malung intheng mak khan asuk manhmang hei.

⁴Thina kani ahong tlung ning khan nei leh hao khan nang sik heite tlotor pek mak che ning, tâk malung intheng inchu nahringkhō ahuk tor.

⁵Malung intheng in mikaṭha hringkhō amanhōi pek, tâk mikaṭhamak he’n anbinga tlâksukna ansyem.

⁶Dikna’n malung intheng mi ahuk, tâk taksenthei kachangmak mihei kha anbinga phâmraiset in akhit hei.

⁷Mikaṭhamak he’n anthi pha, an-inhōrna kha’m anthipui ri jo. Neina haona chunga inngamna nei hi hnemna kase kae.

⁸Mikadik-hei kha inrengna inphut hrungsōt a ka-om hei; mikaṭhamak-hei chung jôk a inrengna hong kasōk a kae.

⁹Pathen inhret mak hei ṭonghri khan amanhmang thei che, tâk mikadik-hei singna khan ahuksōt tor che.

¹⁰Malung intheng mihe’n mahâmṭhatna anchen pha khōpuia mihei kha inpâk hei, khana mikaṭhamak athi’nchu inpâk a ôngna kasip.

¹¹Mikadik he’n vângṭhat anpek pha khōpui kha hong kalensōt, tâk mikaṭhamak-hei ṭong in khōpui kalen kha ansuk manhmang.

¹²Mi ralak raseipuma hrimaset hi akamo ṭōn kae. Mandonna kanei nachang inchu, sip nati sik kae.

¹³Titi kachoi mi khachu ṭongmarûk hripek sik taksen om mak, tâk taksenthei kachang mi ṭhahrep chu hlamrinna nanei tor hei.

¹⁴Hlamkakei kaneimak jât-hei kha katlu sik hei. Tâk-kha mi intheitor katamtak nei hichu inhukna ka-om tina kae.

¹⁵Khōhme inkhat abat choi pek sik a na’ntep inchu insir sik che. Khava khan na’nveimak sik kha nang sik kaṭha jôk.

¹⁶Lungset kathem nuhmei chu mi’n ankaja, nunchen kaṭhamak nuhmei chu inzakpui ka-om. Ratha kase mi’n ahei tik a’m sêr neimak ning, tâk ṭōntloa phâmrai kase mi chu kahao sik.

¹⁷Mi nalungset inchu nabinga a’nlungset che kae. Nahrâng ase inchu nabinga a’nsukset che kae.

¹⁸Mikaṭhamak he’n kadiktak a heite hnemna hmumak hei, tâk akadik kha natlo’nchu, soilo jen a tloman narahlâng sik.

¹⁹Tu mo inkhat in akadik tlo rong ati’nchu kahring sik hei, tâk akadik mak tlo sik a a’ndu hei kha kathi sik hei.

²⁰Ṭhatmak indon mihei kha RŌNGPU’n ahōt hei, tâk akaṭha katlohei kha alungset hei.

²¹Mikaṭhamak-hei kha sôilo jen a karâkna inpek sik hei, tâk mikaṭhahei khachu inphesōt tor sik hei.

²²Mandon theina kaneimak nuhmei hme kaṭha khachu vokpui hnâra sana kutkhi nimakhei kapō kae.

²³Mikaṭhahei tamadu chu ahei tik a akaṭha rōk hong kasōk; mikaṭhamak he’n antamadu kha anchen pha mi rakip anhnuk kana.

²⁴Mi ṭhahrep in ansêr kha anhmang hnōmna anhmang inum anneisa chet-chet. Ṭhahrep in kachîptak a anhmang, tâk sara kachang chet-chet hei.

²⁵Malung kalentak a pek sōt roh, khana nang nanei chet sik; mi inthōpui hei roh, khana nang an-inthōpui sik che.

²⁶Sâng katamtak kada hei, aman inshânga jōr sik tia kahngâk mi kha mihe’n anhâksêr, tâk khavakha jōrna sik akatlo kha anmanpâk.

²⁷Nabitin kha aṭhat inchu ankaja sik che, tâk mihei inrengna sik narei inchu, khavakha nang tachen sik kae.

²⁸Annei anhaona chunga a’nngam hei kha ṭhelaia thingbō kaṭi kapōa kaṭi sik hei, tâk mikadik-hei chu sûr laia thingbō kapōa kakhang sik hei.

²⁹An-innshunga khōdeng theina insōk mihei kha achaina chu heite hmumak ning. Mikamohei khachu ahei tik a mikasinghei sōk kachang sik hei.

³⁰Akadik in hringna apek, tâk innâk-inse khan hringna kha alosōt.

³¹Mikaṭhahei kha raleichunga hinum akaṭha tloman anpek hei, achang jâra mikaṭhamak leh set karônhei kha karâkna anhmu nger sik ti kha namanchên tor a kae.