Read Komrem ṬONGCHÎK-HEI 12 Bible Online

ṬONGCHÎK-HEI 12 - Komrem bible

ṬONGCHÎK-HEI 12

¹Themna indu he’n anṭhe pha leh mi tamanthei sik anmadu. Mandikna kahnōm mak khachu mikamo kae.

²Mikaṭhahei chunga RŌNGPU katlâi, tâk akaṭhamak ṭōn intluk hei kha amaset hei.

³Ṭhatmak hin inhrungna sik pek tor mak, tâk mikadik-hei chu kahnet a kangir hei.

⁴Lômnu kaṭha chu apuise inpâkna leh inlensakna kae, tâk apuise inzakna sik katlo lômnu khachu apuise rua kenser nat kakop kapō kae.

⁵Malung intheng he’n kaṭhatak a anrazen sik che, mikaṭhamak-hei rōk in hōn sik chea anmadu.

⁶Mikaṭhamak-hei ṭonghri chu mi thatna kae, tâk mikaṭhahei ṭonghri khan chu maṭhit a ka-om hei kha ahuk hei.

⁷Mikaṭhamak he’n anthōi tlâkna sik anratōa sōn leh pâr dahlon mak hei, tâk mikadik-hei innshung khachu kahringa ka-om ṭhak hei.

⁸Mi mandon kathem nachang inchu, mi’n anmanpâk sik che; mikamo nachang inchu mi’n anhnōise sik che.

⁹Mikalen omchen a oma vonṭâm de sik kanek a chu micham inkhat omchen a oma hringna sik ṭōn tlo sik kaṭha jôk.

¹⁰Mikaṭha he’n anranhei kaṭha nenga anrazen hei, tâk mikaṭhamak he’n anranhei hnuk kasetak a anrazen hei.

¹¹Ṭōnkatlo kahrat hlei kathlō inkhat in katluk a sâk sik anei, tâk hnemna kase ṭōna apha amanhmang kha mikamo kae.

¹²Mikaṭhamak-hei tamadu seng khachu ṭhatmak ṭōn tlo sik a jong lele kha kae, tâk mikadik-hei khachu kahnet a kangir hei.

¹³Mikaṭhamak-hei chu anṭonghri kalan a in-ôk hei, tâk malung intheng mihei chu khōdeng theina inphut kasōksōt hei.

¹⁴Natloman chen sik khachu, heimo nahri khana heimo natlo dungjuia ka-om jo, narahōi kasōk kha nahmu sik.

¹⁵Mikamo he’n ahei tik a kadik ung anti. Mikasing he’nchu mansena ṭong anrangei.

¹⁶Mikamo’n anmalung ahōi mak inchu inrangtak a anmalârbât. Mandonna kanei mihei chu mihe’n inzakna pek sik anti pha donmak hei.

¹⁷Akadik kha nahri pha ṭongtan kadik kha intlo jo, tâk maleisei khan chu akadik mak amasō.

¹⁸Mandonna kaneimak ṭonghri hei khan chemjâm kapōa inthûktak a atôn, tâk kasing tak a a’nhri ṭong khan chu malung nat damna apek.

¹⁹Maleisei ṭong chu bongkhat rōk sik kae; tâk akadik ṭong chu are-rea sik kae.

²⁰Ṭhatmak ṭōn intluk hei khachu sōkphutrōia hmesetna katlo sik hei kae, tâk akaṭha ṭōn katlohei khachu ningṭhatna anhmu sik.

²¹Mikadik-hei hneng akaṭhamak sōk mak, tâk mikaṭhamak-hei khachu bōina tei loa heite neimak hei.

²²Malei kaseihei RŌNGPU’n ahōt hei, tâk anṭong hrina akangir hei chunga amalung katlâi.

²³Mandonna kanei he’n anmanhret inum sip anti, tâk mikamo he’n anmanhret makna kha anmalârsōt a kae.

²⁴Ṭōntlo hrat in ratha hratna apek sik che, tâk rathaset in sōk amanchang sik che.

²⁵Malungdong in hōina amanhmang pek sik che, tâk lungset ṭonghri’n inpâkna apek sik che.

²⁶Mikadik khachu aṭhōn sik a hlam inthei kae, tâk mikaṭhamak hlam khan hlamleting aṭhōisōt.

²⁷Naratha ase’nchu namadu kha chenmak tin, tâk ṭōn rahnak a natlo’nchu mahâmṭhat nachen sik.

²⁸Akadik hi hringna hlampui kae; malung ṭhatmak hi thina hlampui kae.