Read Komrem ṬONGCHÎK-HEI 14 Bible Online

ṬONGCHÎK-HEI 14 - Komrem bible

ṬONGCHÎK-HEI 14

¹Nuhmeihei singna’n innhlō hi asyemsōt kae, tâk nuhmei kamo he’n an-innhlō anvōkkhōia kae.

²Namalung a’ntheng inchu RŌNGPU kajana nanei ti kha namalâr; namalung a’nthengmak inchu RŌNGPU kajamak che ti kha namalâr.

³Mikamo inlensak he’n ṭong hingja anhri; mikasinghei chu anṭonghri khan ahrung hei.

⁴Hlei khōina sik sehratche naneimak inchu naramsōr karōk sik, tâk nanei inchu sâng kasip a nanei sik.

⁵Taksenthei kachang sâkhi khan ahei tik a akadik ahri, tâk taksenthei kachangmak khan chu maleisei tei loa heite hrimak.

⁶Mi inlensak hêr hei khan ahei tik a mikasing chang tor mak hei, tâk mandonna kaneihei chu kabeitak a anmanhret thei.

⁷Mikamo heia inphut kahlatak a om roh; anmani’n nang manthei sik a heite neimak hei.

⁸Mi invak kha heijâra mo akasing? Ajârchu heimo tlo sik ti kha ama’n amanhret a kae. Mikamo hi heijâra mo akamo? Ajârchu ama’n kamanhret tia indonṭhak a kae.

⁹Mikamo he’n anset inum khôk sakmak hei, tâk mikaṭha he’nchu rangei mandam anmadu.

¹⁰Na’npâkna kha nata kae; nachâmna kha’m nata kae. Tûte’num khahei kha chenpui theimak hei che ning.

¹¹Mikaṭhapa inn khachu, mikaṭhamakpa inn a’nhmang jôn’um khanga lakangir ṭhak sik.

¹²Hlam kadik tia namandon khan thina hlam a aṭhōithei che.

¹³Manui in malung inreng athupthei. Ningṭhatna kha a’nchai pha, malung inrengna kha khang’khan laka-om ṭhak.

¹⁴Mikaṭhamak-hei khan anrahōi kasōk kha anhmu sik. Mikaṭha he’n anṭōntlo dungjuia tloman anhmu sik.

¹⁵Mikamo’n heirakip ataksen sik; mandonna kanei he’n ankethonna sik an-ensui.

¹⁶Mikasing he’n bōina inphut inpesōtna sik insing thei hei, tâk mikamo he’n heitea sakloa inrangtak a ṭōn anphutbât a kae.

¹⁷Hnuk kabong he’n invet ṭōn antlosōt; mikasingdet he’n kadai nenga ka-om hei.

¹⁸Heite inhret mak he’n anmona rahōi kasōk anchen, tâk singna kaneihei chu themna kha inpâkmana inpek heia kae.

¹⁹Mikaṭhamak he’n mikadik-hei ke kunga inkun sik hei anlumlona kha insinsak tak a ander sik hei.

²⁰Misarahei chu tûte’n enhnōm mak hei, insak inthlangbek he’num lungset mak hei, tâk mikahaohei chu ṭhōn katamtak annei.

²¹Hōina namadu’n chu, sarahei lungset a rôn hei roh; tu mo inkhat hnōisetak a tlo hi setna kae.

²²Aṭhatna sik ṭōn natlo’nchu mihei kajana leh taksenna nachen sik; aṭhat makna sik ṭōn natlo’nchu naṭhe jo kae.

²³Ṭōn tlo roh nahringna sik nahmu sik; na’n-ong hnâma ṭong nahri lelea achang inchu sara kachang sik che.

²⁴Mikasinghei chu nei leh hao kha tloman a inpek hei, tâk mikamohei chu anmona khan mi’n anmanhret hei.

²⁵Sâkhi kachang khan akadik ahri pha mi ahuk, akadik mak ahri pha, mi ahōn heia kae.

²⁶RŌNGPU kajana nei hin mi inkhat innshung leh abinga sik a inngamna leh inhrungna apek.

²⁷Thina napesōt hnōm mo? RŌNGPU kajana nei hi hringna tuihnâr kapût kae.

²⁸Reng inkhat lenna hi ama’n mi khongja chunga mo vai arôn, khan vâng khan inhret; anmani omloa ama kha heite changmak.

²⁹Malung kadaia na-om inchu, nang akasing che kae, tâk hnuk kabong na-e jo’nchu, heituk-hrep akamo che mo ti kha namalâr kae.

³⁰Malung kadaia om hin taksa amandama kae, tâk thang kasehrat hi kenser nat kapō kae.

³¹Misara nasuk manrim he’nchu, anmani kasyem Pathen kha inzak napek kae; tâk anmani kha lungset a narôn he’nchu khavakha Pathen kamukna ṭōn natlo kae.

³²Mikaṭhamak he’n akaṭhamak ṭōn antloa anbinga thōi tlâkna hongkachang, tâk mikaṭhahei chu anlungri kaṭha khan ahuk heia kae.

³³Manhretna kaneihei mandonna rakip a singna kha ka-om; mikamo’n singna inti hi heite manhret phâkmak.

³⁴Akadik inti hin phung leh châng amanlen; setna inti hin phung leh châng sik hmaimôkna kae.

³⁵Reng he’n ṭōntlo kathem hlamkakeihei chunga anmalung katlâi, tâk ṭōnkarôn tor mak hei kha karâkna anpek hei.