Read Komrem ṬONGCHÎK-HEI 15 Bible Online

ṬONGCHÎK-HEI 15 - Komrem bible

ṬONGCHÎK-HEI 15

¹Ṭong kadai nenga masôn in hnuknat amandâi, tâk ṭongsō kangar in hnuknat amathok chet.

²Mikasing he’n ṭong anhri pha, them inchu hnōmna malung anmathok, tâk mikamo he’n ṭong anhri pha akanimak rōk anhrisōt.

³Hmun rakip a heimo kasōk RŌNGPU’n amanhret; akaṭha leh akase nitlona chunga ama’n a-ensui ṭhak me.

⁴Lungset ṭong in hringna apek, tâk ṭong êngkase khan namalung amannat a kae.

⁵Nu leh pa ṭong mantheina che heitea nasakmak kha akamo omchen kae; anmani mandikna che narahlâng khan akasing omchen kae.

⁶Mikadik he’n annei anhao kha anda mantûp, tâk mikaṭhamak he’n inrengna a-om pha anman hmangsō.

⁷Themna hi mikasing he’n mihei hneng anhri manthang, mikamo he’nchu khanga tlomak hei.

⁸Mikaṭha he’n derna annei pha RŌNGPU malung katlai, tâk mikaṭhamak he’n ahnenga anta heichoi inthoinahei kha amater.

⁹Mikaṭhamak-hei omdân kha RŌNGPU’n amater, tâk akadik katlohei kha alungset hei.

¹⁰Akadik mak kha natlo’nchu, karâkna inhnaktak inpek sik che; nabinga dikna sik natlo mak inchu kathi sik che.

¹¹Thina ram kha’num RŌNGPU taman hretmak sik heikhat thuptor mak; achang inchu heikhong mo mihring in anmandonna kha Pathen hmaikunga a’nthup tor sik?

¹²Mi inlensak he’n anṭhena mandik sik hnōm mak hei; anmani kanek a akasingdet hei hneng ṭongderna neihnōm mak hei.

¹³Mihring he’n an-inpâk pha kahlim senga anmanui, tâk an-inreng pha chu, kanguireng hei.

¹⁴Manhret theina kanei he’n themna inchû sik anmadu, tâk mikamo he’n anmanhret makna kha antlâipui.

¹⁵Misarahei hringkhō chu ahei tik a kabōiṭhak hei, tâk a’npâk a ka-om he’n hringkhō hi kahōia anhmang.

¹⁶Mikanei changa khōdeng theia om kanek a sara changa RŌNGPU ṭittak a om in kaṭha jôk.

¹⁷Na-en kadahei leh hme katuitak sâk a om kanek a nalungset mihei leh anse-hleina sâk a om hin kaṭha jôk.

¹⁸Hnuk kabong in inkhe beitam amasō, tâk dehrat in malung daina amasō.

¹⁹Naratha ase’nchu hmun rakip a khōdeng theina naratō sik, tâk namalung a’ntheng inchu bōina ratō mak tin.

²⁰Sa kasing he’n anpahei malung anmanhōi. Sa kamo rōk he’n annuhei kha heitea sakmak hei.

²¹Mikamo he’n anmona kha ningṭhatna anneipui, tâk mikasing in akadik kha atlo sik.

²²Ṭong mansena rakip natorchana rahlâng roh, kha achang inchu hmesōna nanei sik; khahei kha achangmak inchu katlasuk sik che.

²³Apha-aphahrep a a’ntōkpui ṭonghri sik hmu hichu heituk a akahōi jo mo!

²⁴Mikasing he’n chungtinga hringna hlam anhro, thōi tlâksukna thina hlam kha hromak hei.

²⁵Êngkasehei inn kha RŌNGPU’n amanhmang sik, tâk renghmeinu karōichu ahukpek sik.

²⁶RŌNGPU’n malung kadikmak ahōt, tâk ṭim leh re intōkna ṭonga khan katlâi.

²⁷Malung intheng loa sêr inhlei namadu’n chu, na-innshung khōdeng theina sik hrep kae. Marûk sêrpek sâk mak roh kahringsôt sik che.

²⁸Mikaṭha he’n ṭong anmasôn mak hma anmandon dek. Mikaṭhamak he’n inranga ṭong anmasôn bât, tâk khava khan bōina amasō.

²⁹Mikaṭha he’n derna annei pha RŌNGPU’n arangei pek hei, tâk mikaṭhamak-hei derna chu donpek mak hei.

³⁰Hmaisō tlaia manui in malung hōina apek che, khana ṭong kahōi in namalung amandam chet.

³¹Mandikna che kha malung kahlut a narangei inchu mikasing che kae.

³²Na’nthem chuk hnōm mak inchu, nabinga a’nsuk inrim che kae. Mandikna che kha narahlâng inchu, hong kasingdet sik che.

³³RŌNGPU kajana nei hin themna kha akachang jo kae. Kajana nachen mak hma a’nsinsak nger sik che kae.