Read Komrem ṬONGCHÎK-HEI 16 Bible Online

ṬONGCHÎK-HEI 16 - Komrem bible

ṬONGCHÎK-HEI 16

¹Eini’n ṭōn mantlukna hei chu nineithei, tâk ṭongchaina chu Pathen ta kae.

²Natlo rakip kha kadik tia namandon thei, tâk RŌNGPU’n nalungtup hei kha ṭong atan hei kae.

³Naṭōn mantluk hei chunga mahâmṭhatna RŌNGPU hneng der roh, khana nang in khahei tlosōtna hme nasō sik.

⁴RŌNGPU tasyem neinâk rakip a’nchaina ka-om et, khana mikaṭhamak-hei radinna chu insuksetna kha kae.

⁵RŌNGPU’n êngkase rakip amater hei; khana anmani kha karâkna antahmu sik a inphut sânsōt mak hei ning.

⁶Ṭong jui roh taksenthei chang roh, khana Pathen in nasetna arangei mandam sik, RŌNGPU ṭong kha jui roh, nachunga ṭhatmak heite sōk mak ning.

⁷RŌNGPU kha namantlai pha, naka-en kadahei kha naṭhōn naman chang tor sik hei.

⁸Malung intheng mak a sêr hingja hlō sik kanek a malung inthengtak a sêr ajingte hlō sik kaṭha jôk.

⁹Nang in naṭōn tlo sik namantluk thei, tâk Pathen in natlona chunga hlam akei che kae.

¹⁰Reng khan Pathen ratha neina leh inṭhōia ṭong ahri; khana ama manṭhatna hei kha ahei tik a akadik kae.

¹¹Neinâk jōrna akher leh akahrik tena kha malung inthengtak a hmang sik RŌNGPU’n amadu khana neinâk jōrna rakip inthengtak a tlo sik amadu.

¹²Rn he’n akaṭhamak inti hi en-hnâm tor mak hei, ajârchu ṭongtan kadik in vairônna kha amanhnet kae.

¹³Reng in ṭongdik kahri arangeihnōm khana ṭong kadik kahri hei kha a-op hei.

¹⁴Mikasing in rengpa malung tlaina atlo sik; rengpa ahnuk anat jo’nchu, mi inkhat kathithei hei.

¹⁵Rengpa ôpna khachu zerkhō sumtuk in ahei rôn khōsûr kapō kae, khana khan hringna ka-om.

¹⁶Sana leh dangka, nei kanek a, singna leh themna nei hi akakhea akaṭhachet kae.

¹⁷Khava mikaṭha he’nchu akaṭhamak kha anpesōtna sik hlam kha anhro; khava jâra nasena hlam kha en kaṭha roh, hivahin nahringkhō ahuktheia kae.

¹⁸Inlensak in insuksetna amansōk, khana êngkase hin thōi tlâkna kachang.

¹⁹Êngkasehei kâra inkhat changa, inru neinâk insempui sik hei kanek a chu sara changa insinsak a om hi kaṭha jôk.

²⁰Heimo antamanthei che khan namalung manhlut roh, khana hmesōna nanei sik; RŌNGPU kha taksen roh, khana inpâkna nachen sik.

²¹Akasing, mandonna pui katluk mi chu athem jâra mihe’n manhretna annei. Aṭong hri ahōi chen a mi amathok chet-chet a kae.

²²Mikasing hneng chu singna hi hringna tuikapût kae, tâk mikamo manthem chûkna sik tlo khachu pha inhmangna kae.

²³Manhret theina kanei he’n anhri mak hma anmandon dek; khana antahri hei kha lothei kachangdet a kae.

²⁴Ṭong lungset kakai hichu khōihning kapō kae, nisâk leh kathlum khana nataksa sik a kaṭha.

²⁵Hlam kadik tia namandon khan thina ting aṭhōithei che.

²⁶Ṭōn katlopa vonṭâm khan ama kha ṭōn amantlo chet-chet, ajârchu avon ṭâm kha kakhop hnōm.

²⁷Mikaṭhamak he’n mihei inhmangna sik anjong; anṭonghri kapha akaṭhamak hmei kapōa kakâng.

²⁸Ṭong titi hi mikaṭhamak he’n ansemsōt; bōina anmasō khana ṭhōn leh re he’m anmanṭhen hei.

²⁹Innâk-inse katlohrat he’n anṭhōn anhōn mathlâk hei khana khōdeng theina anmannei hei.

³⁰Hmit sira naka-en lingling hei leh anha inrôt hei kha chîk hei roh; anmani kha ṭhatmak heikhat antamandon kae.

³¹Hringkhō kasei hi mikadik-hei tloman kae, sam kabang hi lûrna lukhu kae.

³²Rathahrat kanek a dehrat hi kaṭha jôk. Khana khōpui kalenhei kathlimtorpa kanek a abinga malung kasurtorpa kha kaṭha jôk.

³³Mihring in Pathen lungdo manhretna sik a tla ansân, tâk Pathen in khava masônna kha amantluk.