Read Komrem ṬONGCHÎK-HEI 17 Bible Online

ṬONGCHÎK-HEI 17 - Komrem bible

ṬONGCHÎK-HEI 17

¹Bōina kasip innshunga sâklôm tlo kanek a malung kadai nenga buhlom kachâr sâk hin kaṭha jôk.

²Malung kasing sōk in akapu sapa akahnem mak chunga ratha anei sik khana akarōi ṭhen khat achen sik.

³Sana leh dangka a’ntheng leh a’nthengmak chu hmei vâng in-en, khana mi inkhat malung chu RŌNGPU’n a-enmansin.

⁴Mikaṭhamak he’n akaṭhamak mantlukna ṭong kha anrangei, khana malei kasei he’n maleisei ṭong anrangei.

⁵Misarahei kha namanuisō he’nchu ankasyempa Pathen kha inzak napek kae. Mi inkhat in vângset achen pha nang in kahōi nasak inchu karâkna inpek sik che.

⁶Sa leh nai he’n nu leh pa anta’n lensak pui hei kapōa, pu he’n tu leh sahei an-inlensak pui hei.

⁷Mi’n kajana antanei jo hei khan maleisei hrimak hei, khana mikamo he’n ṭong rahōi kasōk hri sik heite neimak hei.

⁸Mi loikhat in marûk a sêr inpek hi hmitphedôi kapōa ṭōn atlo tia anmandon; hivahin heirakip atlo tor tia antaksen.

⁹Mihe’n arangei hei rasoh nati’nchu nahnenga anṭhe pha rangei mandam hei roh. Ṭhenahei hin ṭhōn leh re asukkhōi ti hi mahngi mak roh.

¹⁰Mikamo inkhat in vōi 100 anvōk sōa manhretna ahongnei kanek a, manhret theina kanei inkhat in vōi khat rōk anrasei sōa manhretna ahongnei khan akhe jôk.

¹¹Ahei tik a bōina insōṭhak mikaṭhamak-hei hnenga thina khan inrimna ṭong karônpa kapōa kahong sik.

¹²Mikamo ṭōn kanimak katlohei intōpui sik kanek a ate antalōk kavompui intōpui sik kaṭha jôk.

¹³Akaṭha kha akaṭhamak vânga namale’nchu, na-inn shunga ṭhatmak kha ahei tik a’m hlonsōt tor mak tin.

¹⁴Ṭong inkhe a’nphutbi leh tui tingna ngoi kajâm thakhat kae; akōi chet-chet mak hma tingtan roh.

¹⁵Ṭhenakasehei kha themmô manchen sik khana ṭhena kaneihei kha masō sik, hiva dân inhnibât hi RŌNGPU’n amater hei.

¹⁶Mikamo lekha inchuna sik sêr manhlut hi aṭhatna om mak, ajârchu amandona kipmak.

¹⁷Ṭhōn leh re he’n inlungsetna anmalârṭhak. Inreng pha an-inbôm mak inchu, u leh nai chang kha heimo ahnemna?

¹⁸Mandonna kaneimak mi rōk khan mi sêrbat chunga inkhang sik eng tia intepna anei sik.

¹⁹Setna madu hichu bōina madu leh thakhat kae. Pha rakip a, na’nlensak inchu bōina kajong che kae.

²⁰Tu achang inum ṭhatmak indon leh ṭhatmak kahri khan akaṭha inkhatbek um chen sik inhōr tor mak, inhmangna rōk achen sik kae.

²¹Akamo ṭōnkatlo sa leh naihei nu leh pahei chu malung inrengna leh châmna teilo heite om mak.

²²Malung kahōia om hin nataksa amanṭhat. Pha rakip a malung kanguia om hin jâm katia thina kae.

²³Akadik mak ṭongtanpu hei khan marûk sêr ansâk, khana ṭong kha kadik a tanmak hei.

²⁴Manhret theina kanei inkhat in kasinga ṭōn phut sik intluk, tâk mikamo khan chu ṭōn katamtak phut sik a arei.

²⁵Sa kamo he’n anpahei malung inrengna sik khana annuhei malung insir hêrna sik antlo.

²⁶Ṭhenakase mi inkhat hlei manchoi sik hi dikmak; mikaṭhahei karâkna anpek he’nchu akadik kha akaletting nimahe jo kae.

²⁷Binga inngamna kanei he’n phatina ṭongmak hei. Kadai hngera aka-om mihei khan a’nhri ṭong kha anhmu.

²⁸Hei-achang inum, mikamohei kha’m sip antia anhmur anhip-pang inchu mikasing leh manhretna kaneihei leh teisa thei hei kae.