Read Komrem ṬONGCHÎK-HEI 18 Bible Online

ṬONGCHÎK-HEI 18 - Komrem bible

ṬONGCHÎK-HEI 18

¹Milak leh a’nthlopthei mak hei kha’n anbing rōk sik anmandona kae; mi rakip in kadik antati kha anmani chu hnōm mak hei ning.

²Mikamo’n heikhat amanhret inum amanhret mak inum heite khôk sakmak; ama tamadu chu heituk-hrep mo akasing ti kha malâr sik kha kae.

³Setna leh inzakna hi inṭhōisōm hei. Kajana nachen kha namanhmang inchu, khava kahlânga materna nachen sik.

⁴Mi inkhat ṭonghri kha tui-ôngpui inthûk kapō, kavadung tui insimreng katlân kapōa, singna kung kachang thei.

⁵Ṭhena kanei mi kha pom a, ṭhenakase mi kha mandikmak sik hi dikmak.

⁶Mikamo he’n inkhena sik aphut inchu sung sâkna sik ajong kae.

⁷Mikamo’n ṭong ahri’nchu abinga a’nhmangna sik kae; aṭong hri kalalen chânga khan in-ôk a kae.

⁸Ṭong titi hri hi katui hêr, hiva made sik heituk a nimadu jo mo!

⁹Miratha kase hichu mi kasukset kapōhrep a ṭhamak.

¹⁰RŌNGPU chu repa hngakna berte kahnettak kha kae, mikadik he’n ṭongpek a inthupthei hei khana inhukthei hei.

¹¹Achang inum mikanei he’nchu, ankarōi khan, khōpui kalen kimvea a’nkhâr kurbang kangar leh a’nshâng inkhat kapōa, anmani ahuk sik ung tia anmandon.

¹²Tûte inkhatbek um a’nsinsak mak lai seng mi’n kajana neimak hei; racham kase hei chu inhmangna hlam antahro jo kae.

¹³Ṭongder namasôn mak hma kaṭha rangeidek roh. Achangmak inchu mikamo kachang sik che khana inzakna naratō sik.

¹⁴Nanat pha leh lakahring sik eng tia namandona khan amandam sik che, tâk khava mandonna kha naneimak inchu, a’nchainapen inhōrna kha katlang jo.

¹⁵Manhret theina kaneihei chu pha rakip a ṭong rangei hnōmna leh inchu hnōmna annei.

¹⁶Mikalûr mikalen na’nhmupui hnōm hei mo? Kutchoi rôn pek roh kha achang inchu inhmupui kabei sik.

¹⁷Ama inkhepuipa khan ṭong adermak hma seng chu ṭong tanna hmun a hma inkeia ṭong kahripa kha akadik hêr ka-ang.

¹⁸Ratha kanei mi 2 ṭong tanna hmun a an-inher inchu, tlâ-sân enna rōk hin ṭong atantor sik kae.

¹⁹Na-u nanai kha inthōpui hei roh anmani’n khōpui kalen bang kapōa ankakekhum sik chea kha anhrung sik che, tâk na’nnâkpui he’nchu nang kha ankot ankamde sik che.

²⁰Naṭong hrina rakip hei kara dungjuia nang akahring sik che kae.

²¹Naṭong hri khan hringkhō amanhring thei, a-emak leh amanhmang thei; kachanga naṭong hrina kara kha narahlâng nger sik kasōk.

²²Lômnu inkhat injong roh khavakha akaṭha neinâk nachen jo kae; khava khan RŌNGPU hi nahnenga kaṭha ti amalâr.

²³Misara’n ṭong ahri pha a’nsinsak sik kae, tâk mikanei in ṭong amasôn pha leh chu ṭong kangar ahmang ria kae.

²⁴Ṭim leh re loikhat chu akasôt inthlop mak hei, tâk ṭim leh re loikhat chu u leh nai kanek a inthlop thei hei.