Read Komrem ṬONGCHÎK-HEI 19 Bible Online

ṬONGCHÎK-HEI 19 - Komrem bible

ṬONGCHÎK-HEI 19

¹Mikamo malei kasei inkhat chang sik kanek a sara malung intheng inkhat chang in kaṭha jôk.

²Manhretna kasea tlo hnōmna malungrôn hi ṭhamak; hngâk-hla jâra bōina naratō sik.

³Mi loikhat in anmona jâra anbinga inhmangna annei khana RŌNGPU kha rahno anpek.

⁴Mikahao he’n ahei tik a ṭhōn ather anhmu hei, tâk sara he’n ṭhōn ahlekte he’m inthloppui tor mak hei.

⁵Ṭong tanna hmun a maleisei nahri’nchu, karâkna inpek sik che, inphesōtna om mak ning.

⁶Mi rakip in mikalenhei lungset chenna sik antlo; mikalenhei ṭhōn ung kae anti et.

⁷Sarapa sik a chu asōpuihei kapha anṭhatchômna om mak; ṭhōn um nei tor mak ti hi a’nlak changmak, ṭhōn neina sik rahnak a a’nṭang inum inkhatbek um hmutor mak.

⁸Nabinga lum inlo roh khana nator chenna inthemchûk roh; khana na’nchu kha mandon roh khan chu kakhangsōt sik che.

⁹Ṭongtan hmun a maleisei kahri tûte inkhat karâkna pek sik a inphut tlânsōt tor mak; ama kha a’nhmang jo kae.

¹⁰Mikamohei chu ka-êmtak a aka-om mak sik hei kae, khana sōk he’n mikalenhei chunga vai antarôn mak sik kae.

¹¹Mandonna kanei nachang inchu nahnuknat kha nasurtor sik. Mi inkhat in nahnenga aṭhe pha donloa na-om sik kha, pui katluk omchen inkhat kae.

¹²Rengpa hnuknat chu shabakkai inhrung kapō kae, tâk ama lum lona chu sûrtui niratō kapō kae.

¹³Sa kamo he’n nu leh pa inhmangna antlosōt tor. Nuhmei hrâng kase khachu khōsûr cher-cher kapō kae.

¹⁴Mi inkhat in nu leh pa karōi, inn leh hlei, sêr leh sum, achanthei, tâk mandonna kanei lômnu chu RŌNGPU rōk in apektor.

¹⁵Namadu’n chu naratha manse roh; je kakeng roh, tâk vonṭâm nade sik kae.

¹⁶Pathen dânhei kha jui roh, nahringsei kasôt sik; nadonmak he’nchu kathi sik che.

¹⁷Sarahei hneng pekna nanei inchu, RŌNGPU hneng namanpûk kapō kae, RŌNGPU’n apek male sik che.

¹⁸Nasahei kha ansinlai them inchuthei lai omchen khanchen manthei hei roh. Kha natlo mak inchu an-inhmangna sik ṭōna nabôm hei kae.

¹⁹Mi inkhat ahnuk anat-hrat inchu, akara kha abinga chen rasoh. Vōi khat inrengna inphut nahuksōt inchu, avea tlopek nôk tlit sik kasōk.

²⁰Ṭong mantheina hei narangeia khana inthem chûkna namadu’n chu ni khat mikasing kachang sik che.

²¹Mihe’n ṭōnmantluk hingja anneithei, tâk RŌNGPU lungdo rōk kha antatlosōt sik kae.

²²Phâmrai kase leh mi kalôp hi hmaimôkna inkhat kae; malei kasei chang kanek a sara kachang kaṭha jôk.

²³RŌNGPU ṭong jui roh, nahringsei kasôt sik, nalungdo katlung sik, insuksetna inphut inhuksōt sik che.

²⁴Mi loikhat chu anbei shunga bu thōn sik kapha anratha kase.

²⁵Ṭhatchômna det inhret mak mihei khan, inthem chûkna anneitheina sik, êngkase mi kha karâkna pek sik kae. Nasing inchu, nadikmakna anmanthei che pha inthem chûkna nanei sik.

²⁶Inzak inhret mak, lungset inhret mak mi rōk khan apa kha kaṭha razen mak, a-emak leh anu kha inna inphut ahnong sōt.

²⁷Kasapa, inthemchûk kha nabâng pha leh hma nalei manhret seng kha’m inranga donmak jo che ning.

²⁸Sâkhi kachang mi khan malung suk manrim sik arei pha ṭongtan kadik omphung mak. Mikaṭhamak he’n akaṭhamak mantem sik anmadu.

²⁹Mikamo inlensak chu sung asâk nger sik kae.