Read Komrem ṬONGCHÎK-HEI 2 Bible Online

ṬONGCHÎK-HEI 2 - Komrem bible

ṬONGCHÎK-HEI 2

¹Kasapa, kamanthei che kha inthemchûk roh khana tlo roh, kahrina kha mahngi hêrmak hei roh.

²Singna inti hi rangei roh, khana khavakha manhretna sik tlo roh.

³Kadik, themna sik der roh; ari inthûk hmuna sik ngek roh.

⁴A’nthup a aka-om sêr leh sum a-emak leh nei najong sik kapōhrep a singna kha jong roh.

⁵Kha natlo’nchu RŌNGPU ṭit hi heimo ti namanhret sik jo, khana Pathen chungchânga inthem chûkna hmesōna nanei sik.

⁶Singna kapek kha RŌNGPU kae, ama a inphut themna leh manhretna hong kasōk.

⁷Malung intheng leh mikadik-hei kha ama’n a’nṭangpui hei, khana ahrung hei.

⁸Milak-hei hneng kahōi kaṭha inzenhei kha ahrung hei; khana ama inngei hei kha ahngâk hei.

⁹Kaṭong hri narangei inchu akadik, akaṭha hei kha heimo kae ti namanhret sik, khana natlo sik kha’m namanhret sik jo.

¹⁰Mikasing hongkachang sik che, khana nathemna’n inpâkna apek sik che.

¹¹Ari inthûk a nahmuna leh namanhretna hei khan ahrung sik che

¹²khana akadik mak tlona sik a inphut akhâm sik che. Ṭonghria innâk-inse insōhrat miheia inphut nang kha aṭhen sik che,

¹³anmani akadik hringkhō andahlona set inthimna hringkhōa ka-om hei,

¹⁴akaṭhamak ṭōn tlona inpâk hei, khana akaṭhamak kahōia katheihei kha kae.

¹⁵Hlamrinthei kachangmak hei kha taksenthei um changmak hei.

¹⁶Aṭong hri inne neng nuhmei ka-ôk mak khan ṭhōimanset sik a ajôrna chea inphut nang in natingtor sik,

¹⁷khava apuise sik a taksenthei changlo khana apuise leh inthengtak a an-intepna amahngi jo mi kha.

¹⁸Amanu inna nava se’nchu thina hlam nahro jo kae. Khava hmun a vase sik khachu kathikhō jōnna jo kae.

¹⁹Ama hnenga avakase tûte inkhat hong inle phungmak. Hringna hlam a hong inle phungmak.

²⁰Khava jâra mikadik-hei omchen kha najui nger sik kae; khana akadik hringkhōa aka-om nger sik che kae.

²¹Mikadik-hei, pui katluk hei khan hiva ni-omna ram a hin kaleng sik hei.

²²Tâk-kha mikaṭhamak-hei kha hiva ram a inphut Pathen in akeisōt sik hei, khana mikaset-hei kha kahar kapōa aphoisōt sik jo hei.