Read Komrem ṬONGCHÎK-HEI 20 Bible Online

ṬONGCHÎK-HEI 20 - Komrem bible

ṬONGCHÎK-HEI 20

¹Ju hingja ina inrui hin rasa amantam khana mikamo amanchang che. Ju inrui hi mikamo ṭōn kae.

²Shabakkai anhrung naṭit kapōhrep a hnuk kana jo rengpa kha ṭit roh; ama hnuk mannatpek sik khachu binga inthatna kapō kae.

³Mikamo tu mo inkhat in inkhena ahei phut thei; akaṭhapen chu anmania inphut tlânsōt sik kha kae.

⁴Hleithlō pha ratha kase hêr hlei kathlopa khan sapâr khôm sik heite neimak ning.

⁵Mi inkhat mandonna hei hichu tuikhur inthûk a tui kapō kae, ari inthûk kahmu tor loihei khan khavakha anthetor sik.

⁶Mi rakip in ama hi taksenthei leh ṭong kajui kae tia anhri, taksenthei kachangkhet kha tu mo hmuna sik tlo roh kadiktak kha manhretna sik ensui roh!

⁷Sahe’n malung intheng leh akadik katlopa inkhat annei inchu anmahâm kaṭha.

⁸Rengpa’n ṭong tanna hmun a in-ong khana khō athlir hnâma akaṭhamak kha ahmu sōt.

⁹Mi inkhat in amalung mandon kha inthengpet jo, khana setna neimak jo eng tia tu’n mo atitor sik?

¹⁰Neinâk jōrna kadikmak, akahrik, akatoi, akasei tena kadik kahmang mak hei kha RŌNGPU’n amater hei.

¹¹Naipanghei kapha’m khong khava mihei mo ti kha anṭōntlo khan amalâr; anmalung kaṭha leh intheng ti kha nahri tor.

¹²Hmuna sik hmit leh rangeina sik kōr RŌNGPU’n apek me.

¹³Napha kha jena sik nahmang inchu, sara kachang sik che. Ṭōntloa insaler ṭhak roh sâk sik hingja nanei sik.

¹⁴Neinâk inchôk mi khan aman katam rei tia rasa aneiṭhak; tâk arachôk sō leh asesōt leh chu neinâk man a-epthei jâra khan inlensakna anei.

¹⁵Naṭong hri chungchânga namanhret inchu, sana leh hlung mankatam kanek a mankatam det nanei jo.

¹⁶Khōhme inkhat sêrbat chunga inkhang sik eng tia intepna kanei mikamohei karōi kha sêrbat asōkna sik surpek sik hei kasōk.

¹⁷Malung intheng loa nachen karōi kha bu leh an katui kapōa nasâk thei, tâk inrangtak a khavahei kha beishunga nêrdi kasiptak kapō ka-ang sik.

¹⁸Mansena kaṭha kha rahlâng roh chung sōkna nanei sik; ṭōn mantlukna kasea rehmun a semak roh.

¹⁹Ṭong titi hri hin ṭongmarûk thupthei mak. Hmur kathemheia inphut kahlatak a om roh.

²⁰Nanu napa nahâksêr he’nchu, nahringkhō kha inthim kâra thaihmei kathi kapō kachang sik.

²¹Karōi kabeitak a nahmu kha, nang sik a ahnemna katlôm sik.

²²Akadik mak kha nang in phuhlō sik intluk mak roh. RŌNGPU taksen roh ama’n amandikpek sik che.

²³Akadik mak akatoi, akasei, hlung tena kadikmak kahmang hei kha RŌNGPU’n amater hei.

²⁴RŌNGPU’n nihlam hro sik amandon pek dek me; achang inchu heikhong mo mi inkhat in ahringkhō hlam hro sik kha amanhret tor sik?

²⁵Pathen hneng tōk sik a na’ntep mak hma kaṭha mandon roh. Hnunga insir sik che.

²⁶Reng kasing in akadik mak katlo tu mo ti ahmu sōt sik, khana lungsetna neiloa karâkna apek sik.

²⁷RŌNGPU’n mandon theina leh malung ṭhen theina lungthim apek me; khahei kha einia inphut thuptor mak min.

²⁸Reng inkhat in malung inthenga, kadik a, khana kaṭhatak a vai arôn lai seng ratha aneiṭhak sik.

²⁹Eini’n khangdônghei ratha hratna kha nira-ôt khana katerhei ansam kabang kha nikaja.

³⁰Pha khat a, nijui hlam kha thleng sik niti pha leh malung nat niratō ri.