Read Komrem ṬONGCHÎK-HEI 22 Bible Online

ṬONGCHÎK-HEI 22 - Komrem bible

ṬONGCHÎK-HEI 22

¹Nang in rahming ṭhat, inthang leh neina haona hihei 2 kâra nakadei sik achang inchu, rahming inthang kha kadei roh.

²Mikahao leh sara he’n in-angtlingna inkhat khachu: RŌNGPU’n an-inhnibât a asyem et hei kha kae.

³Mandon theina kanei he’n bōina akahong sik kha anhmu sik khana inphesōt hei, tâk mandonna kaneimak khachu khavatak a khan vakahlut heia hnunga chu insir hei.

⁴RŌNGPU ṭong kha jui roh, insinsak roh; khan chu, neina kajana, khana hringkhō kasei nachen sik.

⁵Nahringkhō nalungset inchu, akaṭhamak surna sik hlamdunga châng inkama inphut sesōt roh.

⁶Naipang he’n heikhong mo akahring sik hei ti kha ansintek a inphut manthei hei roh, khavakha anhringkhō katlung bit a anmandonsōt ṭhak sik.

⁷Misarahei chu mikaneihei sōk-hei kae. Sêr napûk inchu napûknapa sōk jo che kae.

⁸Nang in akadik mak hmuchi navor inchu, khōdeng theina nalōk sik, khana mi nasuk manrim torna ratha kha’m inchai sik jo.

⁹Pekna ting malung kalen chang roh. Khana sâk leh in sarahei sempek hei roh khava sik a vâng inpek sik che.

¹⁰Mi-êng kase kha pesōt roh, kha achang inchu inkhena, innâkna, a-emak leh raseina om mak ning.

¹¹Lungsetna ṭongsō khana malung intheng namadu’n chu, rengpa kha naṭhōn kachang sik.

¹²RŌNGPU’n malei kaseihei ṭong kha lopek mak hei, akadik kha kaṭhadek a hrungna sik a-ensui.

¹³Ratha kasehei kha inna ka-om hei; kansesōt inchu shabakkai in ase sik ung anti.

¹⁴Jôngna hi châng kae, RŌNGPU hnuknat kachen hei kha khava chânga khan akhit hei.

¹⁵Angaia naipang he’n khôk sakloa, aka-emak leh akamo antlo, tâk kaben manthak hin heikhong mo aka-omchen sik hei ti kha amanthei sik hei.

¹⁶Mikaneihei hneng kutchoi napek inchu a-emak leh nahaona sik sarahei kha nasuk manrim he’nchu, sara hongkachang sik che.

¹⁷Rangei roh, mikasing he’n heimo antahri manthei che rong. Anmani mantheina kha inchu roh,

¹⁸khana khavahei kha namandonsōt tor a nahrisōt tor inchu inpâk sik che.

¹⁹RŌNGPU nataksen sik kamadu; khava jâra hihei hi tûn nahnenga kahri pek sik che kae.

²⁰Nang sik a ṭongchîk 30 kamazet jo. Khahei kâra themna leh ṭongpek kaṭha invei hei.

²¹Khana inchêntak a akadik hi heimo kae ti kha, khahei khan anmanthei sik che. Khava sōa akajong sik a antir che pha, ṭong kadik masônna nahei choi sik.

²²Nator ti jâra misarahei hnenga inphut naṭhat chômna sik jongmak roh; ṭongtan hmun a inthōpui sik kaneimak hei hnenga inphut naṭhat chômna jongmak roh.

²³RŌNGPU’n anmani sik a ṭong ahri sik khana anmani inṭhit hei kha ama’n amaṭhitpek sik hei.

²⁴Hnuk kase, innâk-inse kahrat hei ṭhōn changpuimak hei roh.

²⁵Anmani omchen inchu sik chea kha khavakha thleng tor mak um aya.

²⁶Mi inkhat bat chunga inkhangpek sik eng tia intep mak roh.

²⁷Namale tor mak inchu najekhum kapha antalo sik kae.

²⁸Napu napa hei taleida ramri marō kha thonmak roh.

²⁹Ṭōn kaṭha katlo mi inkhat amanhmu roh, khana renghei leh a’nthlop rahōi kasōk hei kanek a akaṭhachet mi ke’n kamanhmu sik che.