Read Komrem ṬONGCHÎK-HEI 23 Bible Online

ṬONGCHÎK-HEI 23 - Komrem bible

ṬONGCHÎK-HEI 23

¹Mikalen inkhat leh busâk sik a na’n-ong pui pha namalunga ama kha tu mo kae ti kha mandonṭhak roh.

²Navon aṭâm hêr inum, inkhâmthei roh.

³Bu leh an katui antamantluk pek che kha na-ê manhrōkmak roh; ama’n nang a-enmansinna che kachang thei.

⁴Haona sik a nataksa manchâm rei makna sik insing thei roh.

⁵Nasêr nei kha hmitkhap khat a kasethei, mathla kanei mârhmu jōng kapōa kajōngthei.

⁶Mi kachîp inna bu sâk mak roh a-emak leh abukatui amantluk kha na-ê manhrōkmak roh.

⁷“Hong roh ajing sade hi roh ati,” tâk kadiktak a ati changmak. Ama ngaihrep kha amandon kae.

⁸Nabu sâk kha namalōksōt sik, khana môk manpâk a mathokna che kha inhmangpet sik.

⁹Mikamo hneng manhretna sik hripek mak roh; ama’n khavakha kaṭha tia lomak ning.

¹⁰Napu napa hei ramri phun thonmak roh a-emak leh nu leh pa kasehei ram lopek mak hei roh.

¹¹RŌNGPU kha ratha kaneitak ankahrung kae, anṭong sōkna chunga nang kadōia a’nkhepui sik che.

¹²Na’nthei oja hneng namalung manhlut roh khana nator chenna inthemchûk roh.

¹³Naipang manse sik inkei-chio mak roh. Nakaben manthakna khan ama thimak ning.

¹⁴Kadiktak a niti’nchu khava khan anhringkhō ahuk sik kae.

¹⁵Kasa, mikasing nahong chang inchu, kei inpâk hêr sik eng.

¹⁶Kasing tak a ṭong nahri kathei pha kei inlensak sik eng.

¹⁷Mikaset-hei chunga nathang manset mak roh; RŌNGPU kaja sik kha nahringkhō ṭōn manchang roh.

¹⁸Kha achang inchu, nahma khōa ṭhattheina nanei jo.

¹⁹Rangei roh, kasa, sing roh khana na-omdân khôk saktak a mandon roh.

²⁰Ju hingja ka-in hei khana sâk kalôp hei leh inthlop mak roh.

²¹Ju-inruihei leh sâk kalôp hei chu sara hongkachang sik hei. Natlo rakip kha sâk leh je achang inchu, inrangtak a pōnse nasibei sik.

²²Napa ṭong rangei roh; ama achangmak inchu nang le’ntemak tin che, nanu ater pha leh namanpâkna malârpek roh.

²³Akadik, singna, themna, khana rachak kaṭhahei hi mankatamtak pek sik anrahōia kae, khana nang tajōrsōt sik a chu maner ka-omhêr hei.

²⁴Sa kadik-hei pa kha amalung inpâkna sik ajâr kaṭhatak ka-om. Sa kasing chunga nang inlensak thei che.

²⁵Nanu napa kha nang jâra manlensak hei roh; khava malung hōina kha nanu manchen roh.

²⁶Kaṭha namalung manhlut roh, sapa, khana kahringkhō hi nang sik a tekâk chang rasoh.

²⁷Noti hei leh omchen kaṭhamak nuhmeihei hi thinathei châng hei kae.

²⁸Inruhei kapōa nang anhngâk che, anmani’n pase katamtak taksenthei manchang mak hei.

²⁹Ju ka-in kahrat mi, juther ṭhahrep intem hnōm mi amanhmu roh, khana ke’n abing sik a a’nreng leh akachâm pha rakip a bōina insō leh mi inphinṭhak kamanhmu sik che. Ahmit kha kasenjap, khana kaṭha anta-en mak jo taksa natbi hingja anei.

³¹Akasenjap achang inum, kōklei shunga akadi rik-rak a, inne jen a atlâk inum, ju khan mathlem tor mak che rasoh.

³²Ajîng jîngkâra chu tûr kanei mari’n amachukzek ka-ang sik che.

³³Nahmit a dumdir kasōk rik-rak sik a kha, kaṭha mandon theimak tin che khana inthenga ṭongsō tor mak tin che.

³⁴Tuipui chunga akasōksōt che kapōa, tui-ôngpuia natna, rakōng keimathlûk leh keimathlâk che kapōa indon sik che.

³⁵Nang in nati sik, “Kei hi antavōk neng jo eng kae, tâk heite manhret mak jo eng. Heijâra mo akathōi tor mak eng? Vōi khat in nôk sik kalamadu,” nati sik.