Read Komrem ṬONGCHÎK-HEI 24 Bible Online

ṬONGCHÎK-HEI 24 - Komrem bible

ṬONGCHÎK-HEI 24

¹Mikaṭhamak-hei omchen kha ra-ôtmak roh, khana anmani leh ṭhōn changna sik tlomak roh.

²Anmani mandonna rakip a bōina rōk anmasō; anbei makhap rakip a mi inkhat malung amannat sik a kae.

³Singna leh manhretna innhmun chunga innshung hi a’nsyem hei kae.

⁴Themna omna hmun a, inndenhei kha mankatam leh hme kaṭha neinâk vânga aret ansyem hei.

⁵Ratha hratna kanek a singna kaṭha jôk; kadik, rathanei kanek a themna hi kalen chet.

⁶Kha heirakip kanek a, re inkhat natuk mak hma ṭōnhlam kaṭhadek a nasyem nger sik kae, akaṭha ṭong mantheina nalo chenna, re kha natordet sik kae.

⁷Akasing ṭonghri hei kha mikamohei tamanhret sik a chu inthûk hêr. Ṭongpui inbekna pha khan chu anmani chu ahri sik manhret mak hei.

⁸Ṭhatmak ṭōn namantluk ṭhak inchu, bōina insōpa inkhat a rahming hi nachen sik.

⁹Mikamo’n tlo sik a amandon ṭōn rakip setna rōk kae. Ama chu heite neilo, tâk milak-hei chu araseiṭhak hei, khang khava mi kha mipui he’n anmater.

¹⁰Ṭong abōilaitak natlâksam jo’nchu, mi katlâksam khet jo che kae.

¹¹Ṭongtan dik loa antathat sik jo mi inkhat hukna sik a malung inkei-chiona neimak roh.

¹²Hihei hichu kei tatlo hlam kasōk inkhatbek changmak natithei, tâk-kha heisik a mo ṭōn kha natlo RŌNGPU’n amanhret khana a-ensin. Ama’n a-ensui ṭhak che; ama’n amanhret. Khana naṭōntlo dungjuia tloman apek sik che.

¹³Kasapa, khōihning in roh; hivahi kaṭha, khōithlara inphut khōihning kha namalek a akathlum kapōa,

¹⁴singna hi rathla sik a kaṭha tia namanhret manchênthei sik. Singna hi jong roh khan chu nahma khōa vârna nanei sik.

¹⁵Malung intheng hei karōi marûk sik a-emak leh an-innshung neinâk rakip kachom sik a ṭōn intluk mikaṭhamak-hei kapō kha changmak roh.

¹⁶Malung intheng he’n vōi heija antlûk jo’num heite khôkmak, anmani chu avea kangirsōt ṭhak hei; tâk khōdeng theina khan mikaṭhamak-hei kha asuk manhmang hei.

¹⁷Na’nrepui he’n khōdeng theina anratō pha inpâk mak roh, anmani an-inpai inthlûk pha’m kahōi sakmak roh.

¹⁸Mihei khōdengthei pha ê-jôna nanei inchu RŌNGPU’n amanhret sik, khana ama’n madu mak ning; khan chu ama’n anchunga karâkna pek mak um aja.

¹⁹Mikaṭhamak-hei khan namalung manchâm mak hei rasoh; anmani kha’m ra-ôtmak hei roh.

²⁰Mikaṭhamak-hei sik hnunghlam om mak, hmating en sik um neimak.

²¹Kasapa, RŌNGPU kha kajana nei roh, khana reng kha rangei manlûrna nei roh. Anmani chunga re katlohei kha leh inmatna heite neimak roh.

²²Khava kapō mihei kha pha bongkhat shunga inhmangthei hei. Pathen a-emak leh reng in an-inhmangna sik anmasōtor ti kha namandonsōt mo?

²³Hihei hi akasing he’n anhrisa hei: Ṭongkatan he’n ôtum nei hi dikmak.

²⁴Anmani’n ṭhena kanei kha ṭhena neimak tia anphôngsōt inchu, mi rakip in anhâksêr sik hei khana anmater sik hei.

²⁵Ṭhena kanei karâkna kapek ṭong katanpa kha hei-achang inum, kakhang sik, khana rahming kaṭha achen sik.

²⁶Malung inthenga insôntō hi ṭhōn kadik chang malârna kae.

²⁷Nahleia khan hmuchi a’nra mak hma khana nahring theina sik ka-om jo ti namanhret mak hma na-inn kha sakmak hi roh, khana innshung phunsōt mak hi roh.

²⁸Ajâr kadik omloa milak maherna sik a sâkhi pek a-emak leh anchungchânga, akaletting ṭhōina sik tlomak roh.

²⁹“Kei hneng anta leitlo kapō ke’num anhnenga katlo sik! Anmani leh la’ntō nger sik ung timak roh!”

³⁰Ke’n mikamo leh miratha kasepa hlei leh vomhrui rahōn shunga leikalôn eng.

³¹A’nhleihei kha rahlingbuk leh kahar he’n anmakhusi jo. Ankimvea hlungbanghei kha’m katlasō jo hei.

³²Khavakha kalei-en, kaleimandon, khana inphut inchuna kaleinei.

³³Namadu’n chu bongkhat inngui ina je roh. Nakut thlep ina bongkhat inhnga roh,

³⁴tâk nang bongkhat naje pha khan, revon invon inrupa kapōa sara changna khan ahlō sik che.