Read Komrem ṬONGCHÎK-HEI 25 Bible Online

ṬONGCHÎK-HEI 25 - Komrem bible

ṬONGCHÎK-HEI 25

¹Judah reng Hezekiah ṭongtan hmun a mihe’n antamazet, Solomon ṭongchîk ṭhahrep hin ka-om hei.

²Neinâk-hei athup a ada hei jâra Pathen kha nikaja; a’nthup neinâk-hei kha anhri manchên jâra renghei kha nikaja hei.

³Reng inkhat in heimo amandon nang in manhret hêrmak che; ama tamandon chu eini mandonna rekhat a ka-om, chungvân inshâng kapō a-emak leh tui-ôngpui inthûk kapō kae.

⁴Dangka a inphut a’nthengmak kha losōt roh khan chu ret kasyem he’n akaṭha neinâk ansyem tor.

⁵Rengpa hnenga inphut akaṭhamak ṭong kathlâk hei kha hnongsōt hei roh khan chu arengram kha akadik ṭongtan jâra inthang sik.

⁶Rengpa hmaikunga nangir pha naṭong manjuina sik a tlomak roh, khana mikalen inhlemsak mak roh.

⁷Naṭōn hmun kha mi kalendetpa hneng pek jo roh tia antamanthei sik che kanek a, a’nshângdet ṭōnhmun matu jo roh tia antangek sik che kha kaṭha jôk.

⁸Nahmu neinâk heikhat jâra inranga ṭongtan hmun a sebâtmak roh. Sâkhi inkhat in hnunga nadikmakna ahri manchên inchu, heimo natlo sik?

⁹Innsak inthlang mi leh nanmalung intōk makna a-om inchu, khavakha malârhêr loa nankâra inchampui hei roh.

¹⁰Achangmak inchu ṭong kathup theimak nachang kha mi rakip in anhong manhret sik, khana ahei tik a’m inzakna thōkloa om mak tin che.

¹¹Kaṭhatak a ṭong hrisōt hichu dangka chunga sanaret ansyem kapō kae.

¹²Manhretna kanei in mi hnenga insing theina ṭong ahri pha sana kutkhi a-emak leh sana inthenga a’nsyem maṭhi kanek a malung kahlut a ṭong rangei sik kha kaṭha jôk.

¹³Taksenthei tirle hichu, sapâr khôm pha alumlaitak tuidai ni-in kapōa akatirpa taksa sik a harna kae.

¹⁴Neinâk apek chu pek hêrlo, kapek sik tia intepna kaneiṭhak mi khachu tui karônmak sumtuk leh thli kapō kae.

¹⁵Dehrattak a ngekna hin kahnettak a antating rape kha’m anamkhōitor khana vaikarôn he’m aṭong amanhnōm tor hei.

¹⁶Nakatluk hrep kakhea khōihning sâk hêrmak roh; atamrei inchu namalōk sik.

¹⁷Nasir napang inna seṭhak mak roh; anhonghōt sik che khana ahongmater sik che.

¹⁸Akadik mak a mi maherna hichu chemjâm, tîngpumbe a-emak leh akangeijap the kapōa thinathei hmangchâk kae.

¹⁹Bōina shunga taksen ka-om mak mi nganse hichu ha ka-om mak in thlai amancha a-emak leh ke kangōi in akalôn kapō kae.

²⁰Malung inrim hneng hlasakpek hichu adai pha mi inkhat in apōnsi alosōt pek a-emak leh taksa intônna bia chi aphi kapō kae.

²¹Naka-en kada he’n anvon aṭâm inchu bu pek hei roh, antui ahre’nchu tui man in hei roh.

²²Khanga natlo’nchu an-inzakna khan anmalung hmei kakâng ka-ang sik, khana RŌNGPU’n nang tloman apek sik che.

²³Sak tinga thli’n sûrtui ahei rôn ngar kapōa ṭong titi hri hin hnuknat amasō.

²⁴Hrâng kase lômnu leh inn inkhat a omsōm sik kanek a phuchung lera binga om kaṭha jôk.

²⁵Achaina pena, ram kahlatak a inphut ṭong kahōi a’nthei hi nakadang achâra natui ahre pha tuidai na-in kapō kae.

²⁶Mikaṭhamak-hei kâra mikaṭha inkhat ahlut khachu tui kabōk kapût a-emak leh tûr kasip tuikhur kapō kae.

²⁷Khōihning katamtak in sik hi nang sik a ṭhamak, khana manpâkna sik rōk jong hi’m khanga kati.

²⁸Nahnuknat na’nsur tor mak inchu kurbang kaneimak khōpui kalen atloje ka-om mak, mihei buhlu theina, inhlângpet a ka-om kapō che kae.