Read Komrem ṬONGCHÎK-HEI 28 Bible Online

ṬONGCHÎK-HEI 28 - Komrem bible

ṬONGCHÎK-HEI 28

¹Mikadik mak chu tûte’n anhnongmak inum katlânsōt a kae, tâk malung intheng mi chu shabakkai kapōa kahrânga kangam sik.

²Jât inkhat in setna atlo pha, anvaikarôn inthleng vângvei sik hei. Tâk-kha jât inkhat in manhret theina aneia, mandonna kanei hlamkakeihei annei pha hong kahrat a, thōkna annei tor sik.

³Sarahei kasuk inrim vaikarôn kha sâng leh be kasuk inhmang thlipui khōpui kapō kae.

⁴Dân kha nakaja mak inchu, nang kha akaṭhamak-hei langa kakop jo che; tâk najui inchu, mikaṭhamak-hei kahnōm mak che kae.

⁵Mikadik mak in ṭongtan kadik kha heimo ti manhret mak hei, tâk RŌNGPU inmuk hei khan chu kaṭha anmanhret.

⁶Mikahao changa malung inthenglo sik kanek a, sara changa malung intheng kha kaṭha jôk.

⁷Dân kajui khangdông kha mikasing kae. Heite kahnemmak mihei leh ṭhōn kachang inkhat kha apa sik a hmaimôkna kae.

⁸Sêrthōi naloa mikanei nachang inchu khana mihei hnenga inphut hnemna najong inchu, nakarōi kha sarahei hneng lungset karônthei mi inkhat hnenga kase sik.

⁹Dân najui mak inchu, naderna kha Pathen in mater ka-om tak a athei sik.

¹⁰Malung intheng mi kha ṭhatmak mantlona sik narei inchu, nabinga chângkama khan in-ôk sik che. Ṭhenakasehei kha tloman kaṭhatak a inpek sik hei.

¹¹Mikahao he’n kasing ung tia indonṭhak hei, tâk omchen arishung akahmu sarapa khan amanhret det a kae.

¹²Mikaṭha he’n ratha hratna anhongchen pha, mi rakip in an-inpâkpui, tâk mikaṭhamak he’n vai anhongrôn pha, mihei kha inthup hei.

¹³Nasetna thupna sik a natlo’nchu nahringkhōa chung sōkna neimak tin, phôngsōt roh khana masō hei roh; kha achang inchu Pathen in nahnenga lungsetna amalâr sik.

¹⁴Pha rakip a RŌNGPU ṭong jui roh kha achang inchu hōina nahmu sik. Naracham aset inchu, nang inhmang sik che.

¹⁵Vaikarôn kaṭhamak hnenga chu sarahei kha inthōpui kaneimak kachang hei; ama chu shabakkai a-emak leh kavom inhrung kapōa ṭit ka-om tak kae.

¹⁶Akaṭha mandonna kaneimak vaikarôn khachu nun kase, lungset inhret mak kachang sik. Malung intheng mak kahōt mi khan pha kasôttak vai arôn sik.

¹⁷Mikathat, ṭhena kanei mi kha atorchena inranga athlânkhur a’ncho jo kae. Khâmna sik tlomak roh.

¹⁸Namalung mantheng roh kha achang inchu inhuk sik che. Namalung a’nthengmak inchu, manhret theiloa katlu sik che.

¹⁹Ṭōntlo kahrat hlei kathlōpa khan sâk sik katluk a anei. Pha inhmanga aka-om mihei khan pha rakip a sara kachang sik hei.

²⁰Malung intheng mihe’n malung inpâkna leh pui katluk hringkhō anhmang sik. Tâk-kha inranga haona sik natlo’nchu, karâkna nahmu sik.

²¹Mi kahnōise hi dikmak. Tâk-kha ṭongkatan ṭhahrep chu akasinpen marûk sêr lona sik a akadik mak kha antlo sik.

²²Bingta rōk indon he’n inranga haona sik antlo khana heitik mo sara changna khan ahlō sik hei ti kha manhret mak hei.

²³Mi inkhat mandik roh, hnung leh chu mise manpâkna chen kanek a khavakha kaṭha aheiti sik.

²⁴Nu leh pahei nei inru hi dikmak tia a’nhret mak mi kha aṭhatdetna sik om mak jo.

²⁵Anbingta sik indon in bōina amasō. RŌNGPU nataksen kha akaṭhapen jo kae.

²⁶Nabinga mandonna rōk najui kha mikamo ṭōn kae. Mikasingdet hei mantheina kha jui roh, khana inhukna nei roh.

²⁷Sarahei pek hei roh kha achang inchu ahei tik a vâtmak tin. Nahmit kha sarahei nakathimde he’nchu, mi katamtak in anhâksêr sik che.

²⁸Mikadik mak in vairônna ratha ahongchen pha mipui inthup hei. Tâk-kha atlûk jo pha leh chu, mikadik he’n avea vai anrôn nôk sik.