Read Komrem ṬONGCHÎK-HEI 29 Bible Online

ṬONGCHÎK-HEI 29 - Komrem bible

ṬONGCHÎK-HEI 29

¹Amandikna che kataia naracham namanse chet-chet inchu, ni khat chu nang anhrop neng sik chea kha heitik che’num ṭhamak jo che ning.

²Mikadik vaikarôn amanhmu roh khana ke’n mi inpâk hei kamanhmu sik che. Mikaṭhamak vaikarôn amanhmu roh khana ke’n mi khōdeng kathei kamanhmu sik che.

³Nang in singna namadu’n chu, nang jâra napa kha inlensak sik. Notinu hnenga sêr mathlâng sik hi mikamohei omchen kae.

⁴Reng khan akadik tlona sik amandon pha, ajât kha kahrat kangar sik, tâk sêr hmun a sik amandon pha, aram kha amanhmang sik.

⁵Naṭhōnhei nahōn he’nchu, nabinga na’n-ôkna sik châng na’nkam kae.

⁶Mikaṭhamak-hei chu ansetna chânga in-ôk hei, malung intheng he’n kahōia ning leh hnōma ka-om hei.

⁷Mikaṭha’n sarahei ratha neina amanhret pek, tâk mikaṭhamak khan khava kapō kha manhret theimak.

⁸Mihei kajana kaneimak mi khan khōpui pumpui kha akachoktor. Mikasing he’n heirakip kadai nenga anda hei.

⁹Mikasing in mikamo chunga dân dungjuia amaher pha, mikamo khachu manui rōk amanui, akare inhrek khana mi arasei heia kae.

¹⁰Thisen insō sik indu he’n malung intheng rakip anmater hei, tâk mikadik-hei khan chu khava mihei hringkhō anhûk a kae.

¹¹Mikamo he’n anhnuknat kha mipui hmaikunga anphôngsōt, tâk mandonna kanei he’n andehrat a anhnuknat ansurtor.

¹²Vaikarôn in akadik mak ṭong thangkōia amalung amanhlut inchu, aṭōn karôn rakip hei kha malei kasei kachang sik hei.

¹³Misara leh anchunga khōdeng inthei hei kha an-in-ang hrepna inkhat ka-om, khachu an-inhnibât a RŌNGPU’n hmit apek hei.

¹⁴Reng inkhat in misarahei dikna chunga angîrpui he’nchu, ama’n pha kasôttak vai arôn sik.

¹⁵Mandikna leh dân manjuina hi naipang sik a kaṭha. Anmani anrachama an-om jo’nchu, anmani jâra annu kha inzak anmanhmu sik.

¹⁶Mikaṭhamak he’n vairônna ratha anmatu pha, innâk-inse hong kapung. Tâk-kha mikadik he’n khang khava mihei thōi tlâkna kha akahmu sik a lakahring sik hei.

¹⁷Nasahei kha manse hei roh khan chu anmani jâra ahei tik a inlensak sik che. Anmani’n nang inzakna ahei tik a heirônsōt mak hei ning.

¹⁸Pathen hlamkeina kaneimak jât-hei kha jât invai hei kae. Pathen dân kajuihei kha jât kahōihei kae.

¹⁹Ṭongngaia hripek hnâm khan chu sōk-hei kha mandik tor mak hei tin. Naṭong chu anlothei sik, tâk anmalung chu manhlut mak hei ning.

²⁰Mandonna neiloa ṭongkahri mi kanek a chu mikamo jôk kha inhōrpui ka-om.

²¹Ansintek laia inphut nasōk-hei kha antamadu rakip napek he’nchu ni khat chu nanei seng um anmani’n antalachen sik kae.

²²Mi hrâng kase’n innâkna leh bōina hingja amasō.

²³Racham kase hin thōi tlâkna amannei sik che, tâk na’nsinsak inchu, mi’n ankaja sik che.

²⁴Mi inru inthloppui hi akaṭhamakpen binga indōina kha kae. Ṭong tanna hmun a aṭhena kha kadik a ahri’nchu karâkna anpek sik, khana akadik ahrimak tâk leh Pathen in karâkna apek sik.

²⁵Mihe’n nang chunga heimo antamandon tia ensui ṭhak sik hi insuk-inpaina kae, tâk RŌNGPU nataksen inchu, inhuk sik che.

²⁶Mi rakip in vaikarôn malung tlaina kha anmadu, tâk RŌNGPU a inphut rōk ṭongtan kadik kha nahmu tor sik.

²⁷Mikadik in mikadik mak amater, khana mikadik mak in mikadik amater.