Read Komrem ṬONGCHÎK-HEI 3 Bible Online

ṬONGCHÎK-HEI 3 - Komrem bible

ṬONGCHÎK-HEI 3

¹Kasapa, kaman theina che hi mahngi mak roh. Tlo sik a kamanthei che kha mandonṭhak roh.

²Kaman theina che hin hringkhō seina leh neina apek sik che.

³Nganse thei taksenthei chang sik hi masō hêrmak roh. Khahei kha nahrak a in-or ina; namalunga mazet manhlut hei roh.

⁴Hivahi natlo’nchu nachunga Pathen leh mihringhei malung katlâi sik.

⁵Namalung pumpuia RŌNGPU kha taksen roh. Nabinga manhretna chunga in-ngai hêrmak roh.

⁶Natlona rakip chunga RŌNGPU kha mandonsōt roh, khana ama’n hlam kadik kha amanhmu sik che.

⁷Nasingna kakhea kasing eng tia mandon mak roh, RŌNGPU ṭong kha jui hnâm roh; akadik mak tlo sik hnōm mak roh.

⁸Nang in kha natlo’nchu, natak kôknabi damna leh nanatna hei manbângna hlei leh âi kaṭhatak kapō kha kachang sik.

⁹Nahleia kasōk kara kaṭhapen vâng khan RŌNGPU kajana nei ina pek roh.

¹⁰Nang in khang’khan natlo’nchu naramsōr sâng kasip sik, khana navomhrui kara manbuk tor mak leoa nanei sik.

¹¹Kasapa, RŌNGPU’n naṭhena amandik che pha, kaṭhadek a rangei roh khana gîkna kae tia inlo roh.

¹²Nu leh pa he’n anta’nlen sakpui ansahei andikmak pha antarakôk hei kapōa, RŌNGPU’n amilungset hei kha andikna sik arakôk hei.

¹³Manhretna kanei mikasing ahong kachang jo tu mo inkhat khan inpâkna hi achen.

¹⁴Singna hi dangka hnemna kanek a kahnem jôk, sana kanek a’m nang sik aman katam jôk.

¹⁵Sana dangka kanek a’m singna hi aman katam jôk; namadu inkhatbek le’m tepui thei changmak.

¹⁶Singna’n hringkhōsei apek che, khan chu neina haona leh kaja na’m apeksa che.

¹⁷Singna’n hringkhō hōina apektor che, khana nahringkhō katlung bit a inhukna hlam akei sik che.

¹⁸Mikasing ahong kachang jo hei kha inpâk hei; singna khan hringkhō apek sik hei.

¹⁹Asingna vânga hiva raleichung hi RŌNGPU’n aleisyem; amanhretna vânga chungvân hi ahmun a aleida.

²⁰Asingna khan tuidung amanlōng khana raleichunga khō mansûrna sik sumtuk asyem.

²¹Kasapa, singna leh ari inthûk hmun a kha matutlit hei roh, khavahei kha nanga inphut hlonsōt mak hei roh.

²²Khahei khan hringkhō kahōi leh hringkhō kaṭha amantluk pek sik che.

²³Nahringkhō hlam a kadam senga kase tor sik che, khana kutsuk kesuk neimak tin.

²⁴Najekhuma ṭitna neiloa kaje sik che, khana jân kathang kahōia kaje hnger sik che.

²⁵Mikaṭhamak-hei chunga inrengna khan thlipui kahrâng kapōa manhret manloa ahong katlung hei kha namalung mandong sik changmak.

²⁶RŌNGPU’n ahrung sik che. Ama’n chânga khan man-ôkmak che ning.

²⁷Khova hmun a achang inum akaṭha inngei hei kha nator chen a tlopek hei roh.

²⁸Tûntak na’nthōpui tor he’nchu, nakhō-navenhei kha ajîng katlunga ahngâk hi ruh tipek mak hei roh.

²⁹Nasir naven hei malung natna sik ṭōn mantlukna neimak roh; anmani nahnenga aka-om hei kae, taksenna antanei che kae.

³⁰Na’nhmangna sik heite katlomak mihei kha ajâr kasea inkhepui mak hei roh.

³¹Innâk-insena sik katlohei omchen ra-otmak roh, a-emak leh an-omchen juina sik mandon mak roh,

³²ajârchu RŌNGPU’n ṭōn kaṭhamak katlohei kha amater hei, tâk ama’n mikadik kha taksenna anei hei.

³³RŌNGPU’n mikaṭhamak innshung ahâksêr hei, tâk mikadik innshunga mahâmṭhat apek hei.

³⁴Mi inlensak-hei kha ama’n heikhat a hmangna neimak. Tâk-kha a’nsinsak mihei kha ama’n alungsetna amanhmu heia kae.

³⁵Mikasinghei khan kajana rahming anchen sik, tâk mikamo he’n anbinga an-inzakna sik rōk anhmusa sik.