Read Komrem ṬONGCHÎK-HEI 30 Bible Online

ṬONGCHÎK-HEI 30 - Komrem bible

ṬONGCHÎK-HEI 30

¹Jake sapa Agur ṭonghri hei kha hihei hi kae: “Pathen in a-ompui mak, Pathen in a-ompui mak, khana kei hi inthōpui sik kaneimak eng kae.

²Mihring inkhat kanek a ranhring inkhat kapōdet jo; mihring taneitor mandonna neimak jo eng.

³Singna heikhat le’nchu hêrmak eng, khana Pathen chungchânga heite manhret mak eng.

⁴Tu’n mo marvân ram chungchâng amanhretsō jo? Tu’n mo akut vânga thli asurtor jo? Achangmak leh pōnhar khat vâng tui akasûntor jo? Achangmak leh raleichung ramri tu’n mo aphun tor jo? Namanhret inchu, ama kha tu mo? Asapa kha tu mo?

⁵“Pathen in intepna anei rakip kha atlosōt. Ama hrungna kajong rakip sik a ama hi pho kapō kae.

⁶Ama’n ahri hêrmak kha nang in heikhat ahri nati’nchu karâkna apek sik che, khana nang namalei kasei tia amalâr sik.”

⁷Kathi mak hma kei hi neinâk 2 amannei roh, Pathen, tia kader che:

⁸Maleisei amanhri mak roh, khana sara a-emak leh haisa’m amanchang mak roh. Kakatluk sik sâk leh in rōk kha apek roh.

⁹Akatamtak kanei inchu, nang rangei mak che eng katithei. Khana sara kachang inchu hong inruthei eng, khana ka-Pathen nang kha inzakna kapekthei che.

¹⁰Ankapuhei hneng sōk-hei kha vahri maset hêrmak hei roh.

¹¹Anpahei kahâksêr leh annuhei ṭhatna akaphôngsōt hêrmak mi ka-om hei.

¹²Akachok hêr heia intheng loa aka-om hei, tâk anbinga intheng ung tia a’ndon mi ka-om hei.

¹³Anbinga kaṭha hêr ung tia indon mi ka-om hei, heituk a akaṭha ung tia a’ndon hei mo!

¹⁴Sara inreng heia inphut hnemna chenna sik phâmrai kase ka-om hei; khavakha anmani hringna hlam kae.

¹⁵Marvot inkhat in sanu 2 anei hei, an-inhnibât a anrahming “Apek roh!” tia anphō hei. Katluk jo ung kati hêrmak 4 ka-om hei.

¹⁶Kathikhō, sa kaneimak nupui, khōsûr inngei ram kachâr, khana that torlo hmei kakâng, hiseng hi kae.

¹⁷Anpa kha sem anmanloa khana annu kha ahongter pha heia kasak mak hei kha hmuthong in asâk sik hei a-emak leh anhmit hei kha va-âk he’n antakhersōt sik a anrahōi kae.

¹⁸Kei sik a manhret a a’ntak hêr ajâr 4 ka-om hei;

¹⁹Marhmu inkhat in chungvâna ajōngna, mari inkhat in hlung chunga alônna, rakōng inkhat in tuipui chunga ahlam ajuina, khana pase inkhat leh nuhmei inkhat leh an-induna hei.

²⁰Nuhmei ka-ôk mak in hinga atlo: ama kha ajôngsōa, tui insi, “Tâk-kha ke’n akadik mak heite tlomak eng!” ati.

²¹Ralei in athōk tor mak ajâr 4 ka-om hei:

²²Sōk inkhat in reng ahong kachang, mikamo inkhat in amadu chenna sâk sik ahongnei,

²³mater ka-om nuhmei in puise ahongnei, khana sōknu’n akapunu ahongthleng hei hi kae.

²⁴Raleichunga akasin sha 4 ka-om hei, tâk invak hêr hei:

²⁵Sihling: ratha neimak hei, tâk khōlum thla heia sâk leh in anbuk.

²⁶Hlung maju: anmani’m ratha neimak hei, tâk hlungkōk shunga anrabu ansyem.

²⁷Khaihei: reng neimak hei, tâk ṭong injuitak a kajōngsap hei.

²⁸Ṭekdai: nakut a nasurthei hei, tâk reng-innpui shunga ka-om tor hei.

²⁹Ankethon enna enhnōm ka-om tak 4 hinahin ka-om hei:

³⁰Shabakkaihei, sha rakip hei kâra ratha kaneipen tûte ṭit loa inngamtak a kalôn.

³¹Kehei, maṭhing katâr ârkhōng hei, khana anmipuihei hmaikunga a’njôk renghei seng hi kae.

³²Mikamo aleikachang jo chea malung kangar leh ṭhatmak ṭōn intluk nalei chang jo’num, inkhim ina mandon hi roh.

³³Senetui nakachok inchu, sene thai nahmu sik. Tu inkhat hnâr navōkpek inchu, athi kasōk sik. Hnuknat kha namathok inchu, bōina kha nachen sik.