Read Komrem ṬONGCHÎK-HEI 31 Bible Online

ṬONGCHÎK-HEI 31 - Komrem bible

ṬONGCHÎK-HEI 31

¹Rn Lemuel nu’n ahnenga ahri pek ṭonghei kha hihei hi kae:

²“Nang hi kasapa marit che kae, kaderna kara kahmu che kae. Heimo kahri pek sik che?

³Naratha nei kha nuhmei inchun puina khan mathlâng mak roh; khana nasêr nei rakip kha nuhmei chunga manhmang mak roh anmani’n renghei anmanhmang jo hei.

⁴Lemuel, rangei roh. Reng he’n ju anta-inmak sik kae khana ju maduna hi antanei mak sik kae.

⁵Anmani’n ju an-in pha, dânhei kha anmahngi khana misarahei dikna kha donpek mak hei.

⁶Ju hichu akathi sik jo hei ta-in sik kae, khana malung inreng hei sik kae.

⁷Ju in hei sona anmalung hōimakna leh ansara changna mahngi hei rasoh.

⁸“Anbinga sik ṭong kahritor mak hei kha hripek hei roh. Inthōpuina kaneimak rakip hei dikna kha hrungpek hei roh.

⁹Anmani sik hripek hei ina ṭongkatan kadik chang roh. Sara khōdeng katheihei hrung hei roh.”

¹⁰Akaṭha katlosōt tor nuhmei inkhat chen sik hi heituk a’ntak mo! Ama man chu hlung mantam kanek a katam!

¹¹Ama kha apuise khan achunga taksenna anei, khana ama kha ahei tik a’m sara changmak ning.

¹²Ama’n ahring lai seng apuise sik akaṭha rōk atlopek, khana inhmangna tlohêr mak.

¹³Ama chu aṭōna insaler ṭhak, sahme pōn leh pat pōn akhônga kae.

¹⁴Inveina katlo rakōng kapōa, amanu’n sâk leh in innshung sik a ahei choi manhlut.

¹⁵Innshung mihei sâk leh in mantlukna sik khana asōk nuhmeihei ṭōnhlam mantheina sik ama’n jîngkâr hmatak a katho.

¹⁶Ama’n ram ajonga arachôk, khana asêr hlō vâng khan vomhrui rahōn asyema aling.

¹⁷Ama chu ṭōntlo kahrat, ratha anei, inhnga tet mak.

¹⁸Akutsyem rakip hei hnemna amanhret, khana jânsôt ṭōn atlo.

¹⁹Ama’n apat kha rahmuia akei khana apōn kha abinga akhông.

²⁰Sara mi inrenghei hneng pekna akut kayâng.

²¹Kavur tlâk pha’m ama chu amalung dongmak ajârchu a-innshung sik pōn kalum anei.

²²Ama’n jekhuma pōn pha sik akhông khana hruipōn kasen innem a’nsia kae.

²³Apuise kha mihe’n kaṭha anmanhret, khōshunga hlamkakei inkhat kae.

²⁴Ama’n pōnhei leh khōnkhitna hei akhông, khana inveina katlohei hnenga ajōr.

²⁵Ama chu ratha anei khana mi’n ankaja khana hnunga sik a malung dongna neimak.

²⁶Ama’n yâm katia kasing tak a ṭong ahri.

²⁷Ama chu ṭōntloa insaler ṭhak khana a-innshunga hmang sik dôr a-ensui.

²⁸Asa he’n achunga inpâkna anphông, khana apuise’n ahri manṭhat.

²⁹Apuise’n, “Nupui katamtak hei hi lômnu kaṭha rōk hei kae, tâk ankhengpet kâra nang akaṭhapen che kae,” ati.

³⁰Enkahōi hmeṭhat hi mihōnna kae khana hmeṭhat hi’m la’nhmang sik, tâk RŌNGPU kaṭit nuhmei chu manpâk sik rahōi kasōk.

³¹Atlona rakip jâra amanu kha kajana pek ruh. Mi rakip kajana ama pek sik a arahōi kae.