Read Komrem ṬONGCHÎK-HEI 4 Bible Online

ṬONGCHÎK-HEI 4 - Komrem bible

ṬONGCHÎK-HEI 4

¹Kasapahei, nanpa’n heimo amanthei chei kha rangei ruh. Nanmalung manhlut ruh, achang inchu manhretna nannei sik.

²Kamanthei chei hi akaṭha kae, achang jâra hivahei hi mandonsōt pet hei ruh.

³Nu leh pahei sapa inkhat rōk kachanglai, naipang kasinteklai,

⁴kapa’n aleimanthei eng. Ama’n ati, “Kahri kha mandonsōt roh, khavakha mahngi khâk mak roh. Kahri kapō-pōa tlo roh, kha achang inchu kahring sik che.

⁵Singna leh ari inthûk a hmuna kha nei roh, kahri kha mahngi mak roh khana heite sakloa tlomak roh.

⁶Singna kha masō mak roh, ama’n ahrung sik che; ama kha lungset roh, ama’n kahōia ada sik che.

⁷Nang in natlo tor akakhôk pen khachu singna hmu sik hi kae. Nachen seng kha ari inthûk a hmuna sik tlo roh.

⁸Singna kha madu roh, ama’n mikalen amanchang sik che. Kakō tlit roh, ama’n kajana ahei rôn pek sik che.

⁹Ama kha nalûrna lukhu kachang sik.”

¹⁰Kaṭong hri rangei roh, kasapa. Heimo kahri kha khôk saktak a mandon roh, nahringsei kasôt sik.

¹¹Singna kha kamanthei jo che, khana hringna sik hlam kadik kamanthei jo che.

¹²Kasing tak a nase’nchu heite inkhat in nahlam tingtor mak ning, khana natlân phale’m inpai inthlûkmak tin.

¹³Na’nthem chuk kha pha rakip a mandonsōt ṭhak roh. Nathemna kha nahringkhō kae, kaṭhadek a hrung roh.

¹⁴Mikaṭhamak-hei sena hmun a semak roh. Mikaṭhamak-hei omchen kha juimak roh.

¹⁵Akaṭhamak kha tlomak roh, khana inphut sesōt roh. Hnōm mak roh, khana najōn sik hlam a khan sehnâm roh.

¹⁶Mikaṭhamak he’n ṭhatmak inkhat antlosōt mak kârseng jethei mak hei. Mi inkhat hi ansukset mak kârseng jehnōm mak hei.

¹⁷Anmani sik a suksetna leh ṭhatmak ṭōntlo hi sâk leh in kapō kae.

¹⁸Mikadik tahro hlam khachu kani ahong kasōk a, sûn pha ahong tlung mak kârseng ahong kavâr chet-chet kapō kha kae.

¹⁹Kachanga mikaṭhamak-hei hlam khachu jân kapōa inthim, katlu hei, khana an-inpai inthlûkna kha hmutor mak heia kae.

²⁰Kasapa, kahri pekna che khan namalung manhlut roh, kaṭong hri hei kha rangei roh.

²¹Nanga inphut mansesōt mak hei roh. Mandon sōt ṭhak hei roh, khavahei kha namalung shunga inda hei roh.

²²Khava inhret hei kha hringna leh damna apek sik hei.

²³Heikhong mo namandon kha insing thei roh; ajârchu namalung mandonna khan nahringkhō kha asyem kae.

²⁴Akadik mak hrikhâk mak roh. Maleisei leh mi akalet a ṭhōina ṭōn tlokhâk mak roh.

²⁵Malung inthenga inngamna leh inṭhōia hmating khō thlir roh; inzak jâra nahmai kha makhup mak roh.

²⁶Heimo natlo sik kaṭhadek a mantluk roh, khana naṭōntlo rakip kha akaṭha hongkachang sik.

²⁷Akaṭhamak kha masō roh, khana hmating intlunhrek a se roh. Akadik a inphut kethon khatbek um thonsōt mak roh.