Read Komrem ṬONGCHÎK-HEI 6 Bible Online

ṬONGCHÎK-HEI 6 - Komrem bible

ṬONGCHÎK-HEI 6

¹Kasapa, mihlop inkhat sêrbatna chunga inkhang sik a a’ntep jo che mo?

²Naṭong hrina kalalen khan asur jo che mo, na’ntepna kalalen khan akhit jo che mo?

³Kha achang inchu, kasapa, nachunga ama’n ṭong anei tor jo, tâk khana inphut sōksōtna sik kha hin ka-om, ahnenga inrangtak a se ina amasōna sik che inder jo roh.

⁴Jena sik a pha hmangmak jo roh, khana châm inhngatna sik bâng jo roh.

⁵Chânga inphut va kapōa jōngsōt roh, a-emak leh shachâng kase heia inphut shakhi kapōa tlânsōt roh.

⁶Miratha kase he’n sihling hei omchen a inphut inthem chûkna nei hei rasoh.

⁷Sihling he’n hlamkakei, savong, a-emak leh vaikarôn neimak hei.

⁸Tâk-kha anmani’n khōlum pha, sâk leh in anbuk a phebi laia sik a intluk a ka-om hei.

⁹Miratha kasepa khan ajekhuma heituk kasôt mo akaje sik? Heitiktâk leh mo ama kha akathōi sik?

¹⁰Ama’n, “Pha bongkhat inhngachot hi rong, kakut thlep eng sona om hi rong” atia kae.

¹¹Tâk-kha aje kathi khan, sara changna khan hmangchâk kachoi mi inru kapōa abuhlu sik jo.

¹²Hnemna kase, mikaṭhamak he’n maleisei anhri lelea kalôn hei.

¹³Nang hōn mathlâkna sik a anhmit anmakhap a an-enlele chea kae.

¹⁴Ahei tik a anlungria akaṭhamak ṭōn anmantluk a hmun rakip a bōina anmasōa kae.

¹⁵Hiva jâra manhret lo theiloa inreng khōdeng theina anchunga katlung sik khana rahnak a atôn sik hei.

¹⁶RŌNGPU tahōt leh tamadumak omchen 7 ka-om hei: inlensak khō thlir, malei kasei, ṭhenakase hei kathat kut, ṭhatmak ṭōn mantlukna malung, ṭhatmak tlosōtna sik a ke kayâng, maleisei inkhatsō leh inkhat kahria sâkhi kapek, khana ṭim leh re kâra bōina insō mihei hi kae.

²⁰Sapa, napa mantheina che kha tlo roh, khana nanu mansena che kha mahngi hêrmak roh.

²¹Anṭonghei kha ahei tik a nalungria invon ina juiṭhak roh.

²²Anmantheina che khan khōhme nase pha leh hlam akei sik che, jân a akahuk sik che, khana sûn pha amanse sik che.

²³Anmani ṭong mantheina chu hmeivâr kapō kae; anmani mandikna che khan heikhonga mo hringkhō hmang sik amanthei sik che.

²⁴Nuhmei kaṭhamak heia inphut khana milak nuhmeihei mathlemna chea inphut aṭhōisōt sik che.

²⁵Anhmeṭhat khan mathlemna mathlâk mak che rasoh, anhmit makhap khan surmak che rasoh.

²⁶Mi inkhat in buhlom pheng khat man vânga noti inkhat ahmutor, tâk nuhmei leh jông inti hichu nei rakip mathlangna kae.

²⁷Napōn mankângloa hmei kha na-ôp chunga napomtor mo?

²⁸Nake mankângloa hmeira-ê chunga akalôntor che mo?

²⁹Khava kapōa mi nuhmei kajepui hichu ṭit ka-om tak kae. Tu achang innum khava katlohei kha khōdengthei anratō sik.

³⁰Inrupa’n avon aṭâm pha amarûk inchu, tûte’n theikada mak hei.

³¹Kachanga, amarûklai ansur inchu marûk neinâk aja 7 apek male sik kae, anei rakip vâng apek male nger sik kae.

³²Tâk-kha mikajông khachu mandonna heite neimak. Ama abinga ansukset jo kha kae.

³³Tûte’n kajana neiloa ama kha anvōk sik; khana inzakna kha area ama ta kachang sik jo.

³⁴Puise inti hi athang aset pha ahnuk kasepen, anphuhlōna kha tlangtik neimak.

³⁵Sêr hingja anpek inum lomak ning; kutchoi hingja anpek inum ahnuknat kha mantlâi tor mak ning.