Read Komrem ṬONGCHÎK-HEI 8 Bible Online

ṬONGCHÎK-HEI 8 - Komrem bible

ṬONGCHÎK-HEI 8

¹Rangei ruh! Singna’n mi abek. Mihe’n antheina sik a.

²Hlam hnenga hmebunga khana hlamsō heia ama kangir,

³Khōpui kalen hlutna a khan, sōngkot panga, ama’n abek a ati:

⁴“Nankhenga hnenga kahri pek chei kae; raleichunga mi rakip kabek hei.

⁵Nangni pui latluk mak chei mo? Pui tlukna sik inchu ruh. Nangni akamo chei mo? Manhret theina sik inchu ruh.

⁶Kaṭong inthang hei hi rangei ruh; kahri pek chei rakip akadik kae.

⁷Ke’n kahri hi akadik kha kae; kei hnenga chu maleisei hei hi mater ka-om tak hei kae.

⁸Kahri rakip akadik kae; akadik mak heite om mak khana ṭong kalet heite om mak.

⁹Ari inthûk a inhret hei sik a chu, heirakip inchênpet, kaṭhadek a akathei jo hei sik a, heirakip intheng seng.

¹⁰Dangka kanek a kaman theina che hi kadei ruh; Sana inthengpen kanek a themna hi kadei jôk ruh.

¹¹“Kei singna eng kha kae, hlung mankatam hei kanek a kaṭha jôk eng; Namadu hei-inkhat leh kei hi tekâkthei changmak eng.

¹²Kei singna eng kha kae, ari inthûk manhretna kanei; ke’n themna leh kadiktak a ṭong tanna kanei.

¹³RŌNGPU kajana nei hi akaṭhamak materna kha kae; êngkase leh mi inlensak, akaṭhamak omchen leh ṭong kadikmak kamater.

¹⁴Ke’n ṭōn kamantluk khana katlosōt hei. Manhretna kanei, khana karatha kahrat.

¹⁵Vairônna sik a renghei ka’nthōpui hei khana akaṭha dân syemna sik vaikarôn kabôm hei.

¹⁶Raleichunga vaikarôn rakip in kei inthōpuina jâra vai anrôntor. Ṭōnpui karôn leh mi kalûrhei kha’m khanga rōk hei kae.

¹⁷Ani inlungset mihei kha ke’num kalungset hei; tu achang inum ani kajong khan ahmu sōt eng.

¹⁸Ke’n mi hnenga pek sik a neina leh lûrna, khangtouna leh hmesōna kanei.

¹⁹Keia inphut chen nantanei khachu, sana inthengpen leh dangka inthengpen kanek a kaṭha jôk.

²⁰Mikadik-hei hlam kha kahro; ṭongtan kadik-hei hlam kha kajui,

²¹ani inlungset hei kha neina kapek hei, an-innhei kha nei kamansip pek hei.

²²“Tenlai RŌNGPU’n heirakip asyem mak hma, ahma inkeipena kei aleisyem eng, akutsyem hma kakeipen eng kae.

²³Heirakip insyem mak hma, ahma inkeipena kei aleisyem eng, kei raleichung ansyem mak hma kei aleisyem jo eng.

²⁴Tui-ôngpui ale’nsyem mak hma kei chu ale’nsyem jo eng kae, tuiripût-hei aleiom mak hma leika-om jo eng.

²⁵Tlângbunghei an-om mak hma leika-om jo eng, hmebunghei anhmun et a anleiom mak hma ale’nte jo eng kae.

²⁶Pathen in ralei leh tlâng kachâr hei asyem mak hma khana raleichunga vaiphin kut maja khat aleiom mak hma kei aleika-omsa jo eng kae.

²⁷Bōirōk kha ahong om pha kei leika-om jo eng, Tuipui chunga kekung keler aleitinglai khan kei leika-om jo eng.

²⁸Chungvâna sumtuk-hei adalai, tui-ôngpuia tuiripût-hei aleimanpût lai

²⁹khana atep pekna kakhea tuihmai kha akemakna sik tui-ôngpui hnenga ama’n ṭong apek lai, raleichung hmun adenglai khan kei leika-om jo eng.

³⁰Kut kathem inkhat kapōa ahnenga leika-om eng. Ani katai inpâkna kung leikachang eng, ama hmaikunga ahei tik a kahōia ka-om eng,

³¹raleichung hi kahōia kathei mihring jât-hei chunga malung tlaina kanei.

³²“Tûnchu, khangdônghei, kahri hi rangei ruh. Kahri kapōhrep a tlo ruh, nangni inpâk sik chei.

³³Kaman theina chei kha kaṭhadek a rangei ruh, sing ruh. Khavakha donmak tlomak ruh.

³⁴Ka-inn hlutna kot hnenga ani tina aka-om ṭhak hei; ka-inn hlutna hnenga ani kahngâk ṭhak hei, kaṭong inngei mihei kha inpâkna anchen sik.

³⁵Kei ani kachen khan hringna achen, khana RŌNGPU’n anchunga amalung katlâi sik.

³⁶Kei ani kachenmak mihei kha anbibinga a’nsukset hei kae; Tu mo inkhat kei ani kahōt kha thina amadu kae.”