Read Komrem ṬONGCHÎK-HEI 9 Bible Online

ṬONGCHÎK-HEI 9 - Komrem bible

ṬONGCHÎK-HEI 9

¹Singna’n a-inn asak, khana chopui 7 aphun.

²Amanu’n sâklôm sik a aran inkhat athat a, ju kha atuina sik maru-marâng amanveia, dokhâng chunga amatunga ada.

³Amanu’n asōk nuhmei atir heia khōpui hmun inshângpen heia mi amanbek hei:

⁴“Hong ruh, heite inhret mak hei!” Khana mikamohei hneng,

⁵“Hong ruh, kabu vasâk ruh, kaju manhei va-in ruh.

⁶Heite inhret mak hei leh nan-inthlop kha bâng ruh, khana hringna chen ruh. Themna hlam kha jui ruh,” amanti hei.

⁷Mi inlensak-hei kha navamanse he’nchu, inzakna rōk kha anpek sik che. Mikaṭhamak-hei kha navarasei he’nchu lung natna rōk kha nachen sik.

⁸Mi inlensak-hei kha manse hêrmak hei roh; nang macheng kha an-en kada sik che. Tâk-kha mikasing namanse he’nchu, ankaja sik che.

⁹Mikasinghei hneng nahri pek rakip khan anmani kha amansing chet sik hei. Mikadik-hei hneng nahri pek rakip khan anmani kha themna amannei chet sik hei.

¹⁰Singna chenna sik a ahma inkeia RŌNGPU kajana nanei sik kae. A’nthengpa kha namanhret jo’nchu nang in manhret theina nanei jo kae.

¹¹Singna’n nahringkhō kum abesapek sik che.

¹²Singna nanei inchu ahnemna nachen sik, khana khavakha nahlon sōt inchu, khōdeng kathei sik kha nang che kae.

¹³Mikamo inti hichu arasa katam, heite inhret mak, khana inzak inhret mak nuhmei kapō kae.

¹⁴Amanu kha a-inna kot kunga in-ong a-emak leh khōpuia a’nshângpen hmun a in-ong,

¹⁵khana anṭōn et a a’nsaler hei, akase akahong hei kha abek heia:

¹⁶“Honghlut ruh, heite inhret mak hei!” ati. Khana mikamohei hneng amanu’n,

¹⁷“Marûk tui in kathlumdet. Marûk thlaisâk katuidet” atipek hei.

¹⁸Amanu inna akahlut mihei kha kathi hei khan chu amanu inna akahlut jo mihei kha tûnchu kathiram shunga nammanhlut jo hei kae ti hi amisur hei khan manhret mak hei, inhret mak hei.