Read Komrem MI INTHEIPA 1 Bible Online

MI INTHEIPA 1 - Komrem bible

MI INTHEIPA 1

¹Hihei hi Jerusalema reng leikachang David sapa mikasingpa ṭonghei kae.

²Mikasingpa’n hnemna kase, hnemna kase kae ati. Hringkhō hi hnemna kase, heirakip hnemna kase kae.

³Nahringkhō kha ṭōn tlona leh inhling inkaina nahmang khana khava khan hei malârna sik a mo?

⁴Khang khat a’nchai leh khang khat kahong nôk, tâk raleichung hichu angaia ka-om ṭhak.

⁵Kani hong kasōk ri, katla nôk ri, ahong sōkna ting invōihlak a inle nôk a kae.

⁶Thli kha thlang ting kahrâng, sak ting kahrâng, ave-avea inher lelea kahrâng khana inle nôk.

⁷Tuidung rakip in tuipui shunga kalōng inhlut, kha’num tuipui kha siptik neimak. Tuidung inphutna khan tui kha hong inle nôk, khana alōng kha aphut nôk.

⁸Neinâk rakip hong invōi ri hei, an invōina kha ahrije om mak; nihmit in a-en chimna sik katluk a neimak, kōr inum rangeia khoptik neimak.

⁹Hmalaia aleikasōk hei kha hong kasōk nôk sik hei. Hmalaia ale’ntlo hei kha hong intlo nôk sik hei. Vânhnōi pumpuia hin ather heite om mak.

¹⁰Anmani’n enroh anti, “Hinahin neinâk ather ṭhahrep ka-om jo.” Tâk-kha changmak, hmalaia eini nilei intet mak hma khan aleikasōksa jo kae.

¹¹Hmalaia aleikasōk omchen kha tûte inkhat in mandonsōt mak hei, khana tuna leh hnunga akasōk sik omchenhei kha kani hnung kakhôra tûte inkhat in heimandonsōt mak hei ning.

¹²Mikasingpa kei hi Jerusalema Israelhei reng leikachang eng.

¹³Ke’n vânhnōia ṭōn intlo rakip hi akhenga enmansinna sik leh inthemchûk sik a le’ntluk eng. Pathen in eini chunga vângset hi apek jo me.

¹⁴Vânhnōia ṭōn intlo rakip hi ke’n kahmu jo, khana kahri pek che hi kae, heirakip hi hnemna kase kae. Thli kahrâng sur sik a nimanloi kapōhrep kae.

¹⁵A’n-ônsa kha nang in mantlun theimak tin; aka-om mak neinâk kha teitor mak tin che.

¹⁶Ke’n kabinga inhri eng, “Kei mi kalentak hongkachang jo eng, khana kei hma Jerusalem vaikarônhei kanek a kasing chet jo eng. Ke’n singna leh manhretna kha hikhet ti kha kamanhret jo.”

¹⁷Themna leh mona, khana singna leh invetna in-ang makna hei kha inthemchûk sik a le’ntluk eng. Kha’num ke’n thlihrâng kamanloi kapō kae tia kamanhret sōt.

¹⁸Nasing chet lai seng, inrengna nanei chet sik; namanhret chet lai seng namalung atôn chet sik.