Read Komrem MI INTHEIPA 2 Bible Online

MI INTHEIPA 2 - Komrem bible

MI INTHEIPA 2

¹Kabinga kahōia ka-om hnōm eng khana hōina inti hi heimo kae tia kajongsōt hnōm. Tâk-kha hivahi’m hnemna kase kae tia kahmu sōt.

²Inpâk manui hi akamo ṭōn kae taksa hōina hin nang sik a ṭhatchômna tlomak tia kahmu sōt.

³Singna maduna khan akei lele enga, ju ina hōina sik tlo sik leh pha kaṭha hmang sik tia kaleimandon. Hiva tlona hin raleichunga mihring hringkhō akabongtek hi hmangna sik a akaṭhapen kachang sik tia kaleimandon.

⁴Ke’n ṭōn kalen tatak katlosōt. Kei sik a innhei kasak khana vomhrui rahōn kaṭhlōhei.

⁵Ke’n rahōn leh thei rahōn kasyem hei, ashunga theikung ajât katamtak kaling hei;

⁶khahei tui sona sik tuikhur kakhōr hei.

⁷Sōk katamtak karachôk hei, ka-innshunga a’nte sōk um kaneihei. Jerusalema aleika-om rakip hei kanek a ran katamchet kaneia kae.

⁸Kavai rônna ram shunga karōi bukna heia inphut sana dangka hingja kamanbuk mantûp. Nuhmei-pase he’n hla ansak a anmanhōi eng, khana mi inkhat tamadu chen nuhmeihei um kaneiheia kae.

⁹Ôk, kei leikalen eng, Jerusalema aleika-om mi rakip nek am leikalen eng, khana kasing na’n amantlâksam hêrmak a kae.

¹⁰Kamadu chen kha kahmu. Hōina rakip a inkhâm mak eng. Katlosōt rakip chunga le’nlensak eng, khana hiva rakip hei hi kaṭōntlo kara kha kae.

¹¹Khava sōa ke’n khahei rakip chunga khan kamandon, khana khava tlosōtna sik heituk kachâmtak a kaleitlo hei mo khana khahei kha ṭhatchômna kase hei kae tia kamanhret sōt hei. Hivahei hi heite kahnemmak thli kahrâng nimanloi kapō kha kae.

¹²Hei-achang inum, reng inkhat in amak hma renghei taleitlosa rōk kha atlo kae. Khava jâra singna a-emak leh inrinloa omna a-emak leh akamo inti hei hi heitina mo tia kamandon manphut joa kae.

¹³Oh, ke’n kamanhret jo, “A’nthim kanek a akavâr akaṭha jôk kapōa singna’n akamo kanek a kaṭha jôk.

¹⁴Akasing he’n khon mo akase hei ti kha anhmusōt, khana mikamo he’nchu hmutor mak hei.” Tâk-kha kei um kamanhretsa ti chu khava mahâmsetna khan nikhenga alahngâk mea kae.

¹⁵Kabinga kamandon, “Mikamo chunga ajōng katlung kha kei chunga’m alajōng katlung sik kae. Khava jâra kasing hêrna inphut heimo kahnempui sik?” Kabinga kamasôn, “Heikhat bek um om mak.”

¹⁶Mikasing kha tûte’n mandonsōt mak, mikamohei kha’m tûte’n mandonsōt mak. Ahong katlung sik kanikhō heia, eini nikhenga anmahngi sik jo me. Nikhenga akathi sik me kae. Mikamo um mikasing um ṭhenloa.

¹⁷Hiva jâra hin hringkhō inti hi kei hnenga chu heite changmak, ajârchu hringkhō shunga inrengna tei loa akaṭha heite heirônsōt mak. Akhenga hnemna kase leikachang; ke’n thlihrâng sur sik a kalei manlōi kha kae.

¹⁸Kaṭōn tlona leh tloman kachen hei hi kei sik a heite ṭhatchômna om mak, ajârchu hihei hi kei ani kathlenghei sik a kaleidahlon sik hei kae ti hi kamanhret,

¹⁹khana ama kha mikasing mo, mikamo mo kachang thei, tu’n mo amanhret? Achang ravâng ke’n kaleitlo rakip hei kha, khana hiva raleichunga kei singna vânga kaleihlō rakip hei kha ama’n anei sik jo hei. Hiva rakip hei hi hnemna kase kae.

²⁰Khava jâra ke’n rahnaktak a ṭōn kaleitlo kha insir hêr enga kae.

²¹Heikhat chenna sik a nasingna, nathemna, nahratna akhenga nahmanga ṭōn naleitlo jo, khan chu heite ṭōn aleikatlo mak mi inkhat hnenga nadahlon sik jo. Hivahi hnemna kase kae khana dikmak a kae.

²²Nahringkhōa ṭōn natlo khana kachâm che, khana khava manhretna sik a heimo malârna nanei jo?

²³Nahring lai seng natlo rakip khan châmna leh malung natna tei loa heite heirônsōt mak. Jân um namandonna kha châmhngatna neimak che. Hiva rakip hi hnemna kase kae.

²⁴Akaṭhapen khachu ni kanihlō kha sâk a, ina, kahōia hmang sik hi kae. Khava kapha kha hmen Pathena inphut akajōng kae tia kamanhret.

²⁵Sâk sik leh hōina kha heikhonga mo nanei tor jo?

²⁶Pathen in amalung intlai hei chunga singna, themna khana inpâkna apek hei, tâk-kha set karônhei khachu ṭōn amantlo hei, sêr amanhlō hei, sêr amankhôm hei, khava anmani tahmu kha amalung katluk hei hneng pekna sik a kae. Hiva rakip hi hnemna kase kae. Hiva hichu thli kahrâng nimanloi kapō kha kae.