Read Komrem MI INTHEIPA 3 Bible Online

MI INTHEIPA 3 - Komrem bible

MI INTHEIPA 3

¹Raleichunga akasōk omchen rakip hei hi Pathen tamantluk dungjuia akasōk hei kae.

²Intetna leh thina pha ka-om, lingna khana phoisōtna sik pha ka-om,

³thasōtna leh mandamna pha ka-om, ṭhetna leh sak pha ka-om.

⁴Inrengna leh inpâkna pha kha ama’n atep a ka-om, ṭajaisui pha leh lâm pha ka-om,

⁵lungsetna sik leh lungset makna sik pha ka-om, injôpna sik leh injôp makna sik pha ka-om.

⁶jongsōtna sik leh inhmangna sik pha ka-om, manbukna sik leh hlonsōtna sik pha ka-om,

⁷keihlerna pha leh kaṭhuina pha ka-om, daihngerna pha leh ṭonghrina pha ka-om.

⁸Ama’n inlungsetna pha leh in-enkadana pha kha atep, re intuk pha leh inchamna pha kha atep.

⁹Niṭōn tloa inphut heimo ṭhatchômna nihmu?

¹⁰Pathen in phurhrik hei amanrôn me hi kamanhret.

¹¹Ama’n heirakip sik aphahrep kha asyem hei. Ama’n hnungṭong manhret hnōmna apek me tâk-kha atlo rakip kha pui katluk a manhret sōtna chu apek mak.

¹²Khava jâra eini tatlo tor sik khachu nihring lai seng nitor chenna inpâktak a leh kaṭhatak a ṭōn tlo sik hi kae tia ke’n kamanhret jo.

¹³Eini nikhenga nisâk, ni-ina niṭōn tlona kha inpâkpui sik kae. Hivahi Pathen kutchoi kha kae.

¹⁴Pathen ṭōntlo rakip hi ahei tik chenna ka-om ṭhak sik ti hi kamanhret. Nangni’n hiva chunga heite dasa theimak tin chei, achangmak leh losōt theimak tin chei. Khana Pathen in atlosōt inkhat khachu ama kajana eini nikangir sik kha kae.

¹⁵Heikhat akasōk rakip achangmak leh alakasōk sik rakip kha ahma inkeia aleikasōk rōk hei kae. Pathen in a’n-angtling omchen kha ave-avea amansōk kae.

¹⁶Hiva chungchôna, raleichunga ṭongtan kadik leh dikna omna sik rahōi kasōk hmun a khan malung ṭhatmak alengna hei kha nanhmusōt, ke’num kamanhret a kae.

¹⁷Ke’n kabinga inhri eng, “Pathen in mikadik leh mikaṭhamak anṭong atan et sik, ajârchu neinâk rakip, ṭōn intlo rakip, apha et a akasōk sik hei kae.”

¹⁸Eini hi ramsha kanek a akaṭhadek changmak me ti hi manhmuna sik a Pathen in a-enmansin me kae tia kamandon.

¹⁹Heijâra mo niti’nchu, mihringhei leh ramshahei taratō vâng hi in-ang et a kae. Inkhat thi kapōa, inkhat um kathi. Anmani hi a’n-angtling ranhringhei kae. Mihring hi ranhring kanek a ṭhatchôm dekmak, ajârchu anmani sik hringkhō hi heite hnemmak a kae.

²⁰Anmani ankhenga hmun khat a, vaiphinna kasesap sik hei, anmani vaiphina inphut ahei kasōk hei kae; anmani khana khan inle nôk sik hei.

²¹Mihring rathla’n chungting kaketoua, ranhei rathla’n thōiting kaṭumsuk ti hi tu mo inkhat in heikhonga mo amanhret manchên tor?

²²Hiva jâra hin eini tatlo sik khachu niṭōn tlona kha nihōi puia aka-om sik me kae ti hi kamanhret sōt. Eini tatlo tor sik heite om mak a kae. Eini nithisō kahnunga heimo kasōk sik ti hi manhretna sik ahlam neimak me.