Read Komrem MI INTHEIPA 5 Bible Online

MI INTHEIPA 5 - Komrem bible

MI INTHEIPA 5

¹Bek-inn kepha insing thei roh. Akadik leh akaṭha a’nhret ṭhen theimak mikamo he’n inthoina tōkna sik a anvakase kanek a inthem chûkna sik a se sik kha kaṭha jôk.

²Nahrisōt mak hma mandon roh. Pathen hneng inrangtak a intepna neibat mak roh. Ama marvâna ka-om khana nang in raleichunga ka-om che, khava jâra nahri sik kakhea hrimak roh.

³Namalung a’nrim chenna narahmang kase chet sik, khana ṭong nahri mantam chenna ṭong kanimak um nahrisōt chet thei.

⁴Khava jâra Pathen hneng intepna heikhat nanei inchu, nator chenna inrangtak a ṭōn vâng tlosōt roh. Ama’n mikamo inkhat kha ahmangje neimak. Tlo sik a na’ntepna kha tlosōt roh.

⁵Intepna neia tlomak sik kanek a chu intepmak in kaṭhachet.

⁶Naṭong hri kalalen in setna ting ṭhōi mak che rasoh, Pathen thempu hnenga khavakha khanga natina changmak tia nahri sik ṭong kha. Heisa mo nachunga Pathen hnuk natna namathlung sik? Naṭōn tlona kha heisa mo namansuk manhmang sik?

⁷Mandonna hingja naleinei inum, akahnem mak ṭōn hingja nalei tlo’num achangmak leh hingja naleiṭong jo’num, Pathen chu naṭit ṭhak nger sik kae.

⁸Sara khōdeng katheihei chunga vaikarôn he’n ṭongtan dik loa, andikna kha mandik peklo heia, khana ansuk manrimna hei kha nanhmu pha inlak sakmak ruh. Ṭōnkarôn rakip hei hi anchung nôk a akalendet ṭōnkarôn he’n anhrung hei, khahei 2 chung nôk a ṭōnkarôn akalendet he’n anhrung nôk heia kae.

⁹Reng inkhat kapha’num kum a sâng ahei kasōk chunga inngaina aneia kae.

¹⁰Nangni’n sêr nanmadu’nchu, tlai tor mak tin chei; haona kha nanmadu’nchu, nanmadu seng kha chentor mak tin chei. Khavakha hnemna kase kae.

¹¹Nahao chenna navei sik um katamchet sik. Nahnempui khachu mikahao inkhat nachang na’nhret hrep kha kae.

¹²Ṭōnkatlo he’n sâk sik katluk hrep a anneithei achangmak leh neithei mak hei, tâk-kha jâna kahōia kaje tor heia kae. Mikahao inchu aneihêr kha’num amalung inrima inṭhanga ka-oma kae.

¹³Hiva raleichunga hin ṭit ka-om tak inkhat ke’n kahmu: Mihe’n ankhôk pha antahmang sik a sêr anmantûp a kae,

¹⁴khavahei kha hlam kaṭhamak a anmanhmang pet hei khana ansahei hnenga pek manhlonna heite neilo heia kabângbit hei.

¹⁵Ni karōksaia hiva vânhnōia nihei hlut kapōa khanga nidahlon sik. Ṭōn khangtuk nileitlo jo’num nichoisōt tor sik heite om mak.

¹⁶Hivahi dikmak a mo! Nihong kapō-pōa kase sik me. Thli kahrâng sur sik kapōhrep a, eini’n ṭōn rahnak a nitlo, heimo nichen tor?

¹⁷Nihringkhō hi inreng leh inthim kâra, malung inrenga, hnuknat a, khana damloa aka-om sik me kasōk a kae.

¹⁸Kahmu sōt kha hinahin ka-om: eini’n akaṭhapen nitlo tor sik khachu Pathen in hringkhō kabongtek apek me shunga hin niṭōn tlona kara kha nisâk a ni-inna kahōia aka-om sik me hi kae; hivahi eini mahâm kha kae.

¹⁹Pathen in nei leh hao khana hōina apek me’nchu, eini a’npâk sik me kae khana niṭōn tlo kara kha kahōia nihmang sik kae. Hivahi Pathena inphut kutchoi kae.

²⁰Pathen in nikahōi sik hi ahnōm jâra, hringkhō hi heituk abong inum a’nreng mak sik me kae.